Le Davidoske. Gjili.
1Veselo kudo kai šibisailo ai jertin leske;
Kaske e bezex ai jertime!
2Veselo o manuš kaske o Baro Del či phenel leske bezex,
Ai ande o duxo savesko nai xoxaimos!
3De sode vramia me ašilem muto, muře kokala phabonas,
Me vativas ma sa o dies;
4Ke diese ai riate tjiro vast pharo pe mande,
muři zor mai sas ferdi šuki, sar le milaski.
5Me kerdem te žianes muři bezex, me či garadem muři bezex;
Me phendem: Me phenava muře dilimata ka o Baro Del!
Ai tu khoslian o pokjinimos katar muři bezex.
6Ke kadia sako manuš kai patial te řudjil tu ande e vramia kai trubul!
T'avena bare paia te peren, či aresena ži leste.
7Tu san mange kai garadiovav, tu lesa sama mandar katar o nekazo,
Tu ankolis ma le gjiliansa skipimaske.
8Me sikiarav tu ai sikavava tuke e vurma sar tu trubus te trais;
Me phenava tuke sar te keres, avena muře jakha pe tute
9Na kerdio sar jekh grast vai jekh mula kai nai godiaver;
Phanden len jekha pinza sa ai le salavarinsa, kai thon pe lende,
Eta te na pašion paša tute.
10But dukh si e partia le nasuleski,
Numa kudo kai puřil pe ka o Baro Del si krugom lestar o šukarimos.
11Vorta, veselin tume ande o Baro Del ai aven ande e veselia!
Phurden tsipimata veselimaske, tume savoře kai si tumaro ilo vorta.
