1Psalmo le Davidoske.
Šiave le Devleske, den ka o Baro Del,
Den ka o Baro Del vestimos ai pativ!
2Den ka o Baro Del vestimos pe lesko anav!
Bangion angla o Baro Del le vestonsa svintsime!
3O hango le Bare Devlesko ašundiol pe le paia,
O Del o vestime kerel te bašel o řondieto;
O Baro Del si pe le bare paia.
4O hango le Bare Devlesko si zuralo,
O hango le Baro Devlesko si amperatisko.
5O hango le Bare Devlesko phařavel le tsedruri;
O Baro Del phařavel le tsedruri anda o Libano,
6Vo kerel te xuten sar le vitselia
Ai o Libano ai o Sirion, sar terne guruva.
7O hango le Bare Devlesko kerel te xuten paři anda e jag.
8O hango le Bare Devlesko kerel t'isdral e pusta;
O Baro Del kerel t'isdral e pusta katar o Kadeš.
9O hango katar o Baro Del kerel t'arakhadion le čerbutsuri,
Vo nangiarel le veša.
Ande leski avlin sa tsipin: vestimos.
10O Baro Del sas pe pesko skamin amperatisko kana sas e bare talazuri;
O Baro Del pe pesko skamin amperatisko amperetsil pe sakda.
11O Baro Del del zor peske narodos;
O Baro Del svintsol peske narodos ai kerel t'avel veselo.
