1Le Davidoske.
Baro Del! pe tute me tsipiv,
Muřo bař! na beš kašuko ka muřo hango,
Daratar ke, te duriosa bite des ma anglal,
Me avava jekh fialo sar kudala kai vulen ande e groapa.
2Ašun o hango muře mangimaske, kana tsipiv pe tute,
Kana me vazdav muře vast karing tjiro svinto than.
3Na ninger ma le nasulensa ai le bezexalensa,
Kai den duma pa e patia ka pesko vortako ai kai si
le e xitria ande o ilo.
4De le sar kerel lenge butia ai sar si e xitria so vo keren,
De le sar si e butji anda lengo vast;
De le o pokjinimos kai trubul le.
5Ke von či len sama ka e butji le Bare Devleski,
Ka e butji leske vastengi.
Kai vo del le muial ai či mai vazdel le!
6Svintsime t'avel o Baro Del!
Ke vo kerel pe o hango so me mangav.
7O Baro Del si muři zor ai muřo fedevo;
Ande leste patial muřo ilo, ai avava ažutime;
Si ma veselia ande o ilo,
Ai me řudjiv les muře gjiliansa.
8O Baro Del si e zor peske narodoski,
Vo si o bař le skipimasko katar lesko svinto.
9Skipisar tjire narodos ai svintsosar so si tutar!
Av lengo pastuřo ai kudo kai ningerel len pe sakda!
