1Le Davidoske.
Baro Del! vazdav tute muřo duxo.
2Muřo Del! Tuke phenav:
Te na avav pherdo lažiav!
Ke muře dušmaia te na veselin pe pala mande!
3Sa kudala kai ažiukeren ande tute či prasana le;
Kudala avena prasane kai nai vorta ka e diela.
4Baro Del! ker te žianav tjire vurmi,
Sikiar ma tjire vurmitsi.
5Ninger ma ande tjiro čačimos, ai sikiar ma;
Ke tu san o Del muře skipimasko,
Tu san sakda kai ažiukerav.
6Baro Del! de tu godji katar tjiri mila ai katar tjiro mištimos;
Ke von si pe sakda.
7Na de tu godji ka le doša kana simas terno ai katar so me šibisailem;
De tu godji mandar sar si tjiri mila,
Pala tjiro mištimos, o Baro Del!
8O Baro Del si lašio ai vorta:
Sa anda kudia sikavel le bezexalenge e vurma.
9Vo ningerel le proston ande e kris,
Vo sikiarel le proston leski vurma.
10Sa le vurmitsi le Bare Devleske si miloso ai čačimos,
Kudalenge kai ninkeren leski patia ai leske poronki.
11Si pala tjiro anav, o Baro Del!
Ke tu jertis muři bezex, ke voi si bari.
12Savo si o manuš kai daral katar o Baro Del?
O Baro Del sikavel leske e vurma kai vo trubul t'alol.
13Lesko duxo hodinil ande e veselia,
Ai leski vitsa avela lenge o them.
14E vortečia le Bare Devleski si kudalenge kai daran,
Ai leski patia del te sikiarel.
15Me amboldav butivar muře jakha karing o Baro Del,
Ke vo ankalavela muře punře anda e setka.
16Dikh pe mande ai t'avel tuke mila mandar,
Ke me sim muklo ai nekežime.
17Le dara muře ileske bution;
Le ma avri anda muřo nekazo.
18Dikh muřo čořimos ai muři dukh,
Ai jertisar sa muře bezexa.
19Dikh sode muře dušmaia si but,
Ai če zuralia xoliasa žian pala mande.
20Arakh muřo duxo ai skipisar ma!
Te na avav tele,
Kana rodav paša tute te garadiovav!
21Ke o bi došalo ai o čačimos len sama mandar,
Kana thav ande tute muřo patiamos!
22O Del! skipisar o Israel
Anda sa leske nekazuri!
