Psalmo 22

₂Muřo Del! muřo Del sostar muklian ma,

Ai durios tu dur mandar bi t'ažutis ma,

Bi t'ašunes muře vatimata?

₃Muřo Del! me tsipiv diese, ai tu či des anglal;

Ai riate, ai nai ma hodina.

₄Ai tu san o Svinto,

Tu bešes maškar o luvudimos katar o Israel.

₅Ande tute patian pe amare dada;

Von patiana, ai tu skipisaresa le.

₆Von tsipinas tute, ai von sas skipime;

Von patianas ande tute, ai von nas tele.

₇Ai me, me sim jekh řima ai na jekh manuš,

O prasaimos katar le manuš ai o vuřito katar o narodo.

₈Sa kudala kai dikhen ma maren mui mandar,

Von putren o mui, miškin o šero:

₉De tu ka o Baro Del!

O Baro Del skipila les,

Vo skipila les, ke vo kamel les!

₁₀E, tu ankaladian ma anda o peř la dako,

Tu thodian t'arakhes ma pe le čučia muřa dake;

₁₁Katar e čuči la daki me simas t'arakhes ma,

De katar o peř muřa dako tu sanas muřo Del.

₁₂Na žia dur mandar kana o nekazo si paše,

Kana khonik či avel te ažutil ma!

₁₃But guruva si krugom mandar,

Guruva anda o Bašan terdion krugom ma.

₁₄Von putren pe mande pengo mui,

Jekh fialo sar o liono kai šinel ai tsipil.

₁₅Me sim sar o pai kai pitial,

Ai sa muře kokala hulaven pe;

Muřo ilo si sar o mom,

Vo bilal ande muře pořa.

₁₆Muři zor šukiol sar e čik,

Ai muři šib astardiol ka muřo taloi;

Tu inčares ma sar e kišai le merimaski,

₁₇Ke le žiukel ankolin ma,

Jekh banda čor phiren krugom mandar,

Von kerde groapi ande muře vast ai ande muře punře.

₁₈Me šai gjinav sa muře kokala.

Von len sama, von dikhen pe mande;

₁₉Von hulaven muře tsalia,

Von khelen pe kon te niril muři bunda.

₂₀Ai tu, Baro Del, na žia dur!

Tu kai san muři zor, av sigo t'ažutis ma!

₂₁Le sama muřo duxo katar e xanřo,

Muřo traio katar e putiaria le žiuklengi!

₂₂Skipisar ma anda o mui le lionosko,

Skipisar ma katar le šinga le guruveske!

₂₃Me vestiva tjiro anav maškar muře phral,

Me luvudiva tu maškar e kumpania.

₂₄Tume kai daran katar o Baro Del, vestin les!

Tume sa, kai san katar o Jakob, luvudin les!

Isdran angla leste, tume sa, kai aven katar o Israel!

₂₅Ke vo či vuřitsil, či prasal katar le dukha le čořeske,

Ai vo či garavel lestar peski fatsa;

Numa ašunel leste kana tsipil pe leste.

₂₆Tu avesa ande le bare kumpani e diela muře vestimaski;

Me kerava so phendem angla kudala kai daran tutar.

₂₇Le čoře xana ai čailiona,

Kudala kai roden le Bare Devles vestina les.

Ke tumaro ilo te trail pe sakda!

₂₈Sa le koltsuri la lumiake dena pe godji ka o Baro Del ai amboldena pe karing leste;

Sa le famili le themenge dena čanga angla leski fatsa.

₂₉Ke le Bare Devleske si e amperetsia:

Vo si baro pe sa le thema.

₃₀Sa le zurale la phuviake xana ai dena čanga vi von;

Angla leste klonina pe sa kudala kai si te vulen ande e kišai,

Kudala kai naštin te garaven pengo traio.

₃₁Kon avena služina les;

Dena duma pa o Baro le vitsi kai avena mai angle.

₃₂Kana von avena, von phenena leski kris,

Von phenena leski butji ka o narodos kai arakhadiola.