Psalmo 135

₁Luvudin le Bare Devles!

Luvudin o anav le Bare Devlesko,

Luvudin les, služi le Bare Devleske,

₂Kai bešen ande o kher le Bare Devlesko,

Ande le baria katar o kher amare Devlesko!

₃Luvudin le Bare Devles! ke o Baro Del si lašio.

Gjilaben ka lesko anav! ke vo si lašio.

₄Ke o baro Del alosardias peske o Jakob,

Israel, t'avel lesko.

₅Me žianav ke o Baro Del si baro,

Ai ke amaro Baro si opral sa le dela.

₆Sa so o Baro Del kamel, vo kerel,

Ande le čeri ai pe phuv,

Ande le mari ai ande le uni.

₇Vo kerel t'anklen le nuveria anda le gora la phuviake,

Vo kerel le strefiaimata ai o brišin.

Vo tsirdel e balval anda peske moxte.

₈Vo malavel le mai angluni arakhade katar e Egipta,

De katar le manuš ži ka le žigeni.

₉Vo tradel semnuri ai čudeni ande tute, Egipta,

Pe o Faraono ai pe sa leske služi.

₁₀Vo malavel but themen,

Ai mudaren amperatsi zurale,

₁₁Sihon, amperato anda o Amoren,

Og, amperato anda o Ba san,

Ai sa le amperatsi anda o Kanan;

₁₂Ai vo dias lengo them t'avel lengo,

T'avel ka o Israel, lesko narodo.

₁₃Baro Del! tjiro anav bešel pe sakda,

Baro Del! tjiro gindimos žial vitsa vitsatar.

₁₄Ke o Baro Del dela kris peske narodos,

Ai avela leske mila katar peske služi.

₁₅Le statui le themenge si rupune ai sunakune,

Von si e butji katar o vast le manušeske.

₁₆Len si le jekh mui ai von či den duma,

Len si le jakha ai von či dikhen,

₁₇Len si le kan ai či ašunen,

Len nai le phurdimos ande o mui.

₁₈Von si sar lende, kudala kai keren le,

Sa kudala kai ažiukeren ande lende.

₁₉Kher katar o Israel, svintson le Bare Devles!

Kher katar o Aron, svintson le Bare Devles!

₂₀Kher katar o Levi, svintson le Bare Devles!

Tume kai daran katar o Baro Del, svintson le Bare Devles!

₂₁Ke anda o Sion te svintson le Bare Devles!

Kai bešel ande o Jerusalem!

Luvudin le Bare Devles!