Psalmo 116

₁Drago mange o Baro Del, ke vo ašunel

Muřo hango, muře řudjimata;

₂Ke vo bangiardias pesko kan karing mande;

Ai me akharava les sa muřo traio.

₃Le phandimata le merimaske sas krugom mandar,

Ai le dara le groapoševoske line ma;

Simas ande e dar ai ande e dukh.

₄Numa akhardem o anav le Bare Devlesko:

O Baro Del, skipisar muřo duxo!

₅O Baro Del si miloso ai vorta,

Amaro Del si pherdo mila;

₆O Baro Del arakhel le proston;

Me simas nekežime, ai vo skipisardias ma.

₇Muřo duxo, žia palpale te hodinis,

Ke o Baro Del kerdias tuke mištimos.

₈E, tu skipisardian muřo duxo katar o merimos,

muře jakha katar le asva,

muře punře katar o perimos.

₉Me phirava angla o Baro Del,

Pe e phuv le živindongi.

₁₀Sas ma patiamos, makar ke phenavas:

Me sim but nekežime!

₁₁Me phenavas ande muři dar:

Sako manuš athavel.

₁₂Sa dava me ka o Baro Del

Sogodi kerdias mange?

₁₃Me vazdava o taxtai le skipimatange,

Ai me akharava o anav le Bare Devlesko;

₁₄Me kerava so phendem karing o Baro Del,

Angla sa lesko narodo.

₁₅La si kuč ka le jakha le Bare Devleske,

E martia kudalengi kai vo kamel.

₁₆Ašun mande, o Baro Del! ke me sim tjiri sluga,

Tjiri sluga, šiav katar tjiri sluganka.

Tu puterdian muře šele.

₁₇Me dava tu jekh sakrifiso šukar,

Ai me akharava o anav le Bare Devlesko;

₁₈Me kerava so phendem karing o Baro Del,

Angla sa lesko narodo,

₁₉Ande le baria katar o kher le Bare Devlesko,

Ande tute, Jerusalem.

Luvudin le Bare Devles!