1Na amenge, Baro Del, na amenge,
Numa tjire anaveske des barimos,
Pala tjiro mištimos, pala tjiro čačimos!
2Sostar le thema phenena von:
Kai lo lengo Del?
3Amaro Del si ande o čeri,
Vo kerel sa so vo kamel.
4Lenge vobrazi si rupune ai sunakune,
Von si kerde anda le vast le manušenge.
5Len si les jekh mui ai či den duma,
Len si le jakha ai či dikhen,
6Len si le kan ai či ašunen,
Len si le nakh ai či šungan,
7Len si le vast ai či asban,
Punře ai či phiren,
Len nai le či jekh bašimos ande lengo girtiano.
8Von mazion pe lende, kudala kai keren le,
Sa kudala kai den pe lende.
9Israel, de tu ka o Baro Del!
Vo si lengo skipitori ai lengo fedevo.
10Kher katar o Aron, de tu ka o Baro Del!
Vo si lengo skipitori ai lengo fedevo.
11Tume kai daran katar o Baro Del, den tume ka o Baro Del!
Vo Si lengo skipitori ai lengo fedevo.
12O Baro Del del pe godji amende: vo svintsol,
Vo svintsol o kher katar o Israel,
Vo svintsol o kher katar o Aron,
13Vo svintsol kudalen kai daran katar o Baro Del,
Le tsinořen ai le baren;
14O Baro Del butiarela tumenge peske mištimata,
Tumenge ai tumare glatenge.
15Aven svintsime katar o Baro Del,
Kai kerdias le čeri ai e phuv!
16Le čeri si le čeri le Bare Devleske,
Numa dias e phuv ka le šiave le manušeske.
17Nai le mule kai vestin le Bare Devles,
Nai khonik anda kudala kai vulen ande o than muto;
18Numa ame, ame svintsosaras le Bare Devles,
De akanara ai pe sakda.
Luvudin le Bare Devles!
