1Sostar, o Baro Del! san tu dur amendar?
Sostar garaves tu ande e vramia kana si nekazo?
2O nasul ande pesko barimos našel pala le čoře,
Von si marde katar so vo kamlias te kerel.
3Ke o nasul luvudil pe so vo kamlias te lel,
Ai kai čorel, vuřitsil le Bare Devles.
4O nasul phenel ande le barimatande: Vo či del strafo!
Nai Del! Eta sa leske ginduri.
5Leske vurmi nirin les ande sa le vrami;
Tjire krisa si pria opre te šai len le,
Vo phurdel pe sa peske dušmaia.
6Vo phenel ande pesko ilo: Me či perav,
Me sim pe sakda arakhado katar o nasulimos.
7Lesko mui si pherdo armaia, xoxaimos ai čorimos;
Si tela leski šib xitrenia ai bezex.
8Vo garadiol paša le gavořa,
Von mudarel kon nai došalo ande le thana čordanes;
Leske jakha roden le čořes.
9Vo garadiol sar o liono ande peski groapa,
Vo lel sama te xutel pe o čořo;
Vo lel les ai anel les ande peski setka.
10Vo bangiol, vo bešel tele,
Ai le čoře peren ande leske ungji.
11Vo phenel ande pesko ilo: O Del bustrel!
Vo garavel peski fatsa, vo či dikhel!
12Ušti, Baro Del! o Del, vazde tjiro vast!
Na buster le čořen!
13Sostar o nasul vuřitsil le Devles?
Sostar phenel vo ande pesko ilo: Tu či des strafo?
14Ai tu dikhes, ke tu dikhes o nekazo ai e dukh,
Te les ande o vast lengi diela;
Tuke del pe o čořo,
Tu aves t'ažutis le baiastrukos.
15Phag o vast le nasulesko,
De strafo leske bezexen, ai te bilavol angla tjire jakha!
16O Baro Del si amperato pe sakda ai ži ande o gor
Le streia naroduri si bilade anda lesko them
17Tu ašunes so mangen kudala kai kjinuin, o Baro Del!
Tu zuriares lengo ilo; tu thos kan
18Te des kris le baiastrukos ai le čořes,
Eta ke o manuš kerdo anda e phuv te na mai daravel.
