Filemon 1

₁O Paul, ande e temnitsa katar o Jesus Kristo, ai o phral o Timoteo,

ka o Filemon, amaro mai drago ai amaro vortako ande e butji, ₂ka e phei Apia, ka o Arxipo, amaro vortako ande o marimos, ai ka e Khangeri kai si ande tjiro kher:

₃ke o mištimos ai e patia t'aven tumenge dine katar o Del amaro Dad ai katar o Rai o Jesus Kristo!

₄Me sakda naisiv muře Devles, dav duma pa tute ande muře řudjimata, ₅ke mange phende pa tjiro patiamos kai tut si tu ande o Jesus Kristo pe sa le svintsi. ₆Me mangav les ke tjiri partia ka o patiamos t'avel bari pe e butji le Kristoski, te kerel te žianen ande amende sako fialo mištimos. ₇Sas ma, čačes, but veselia ai mila pala tjiro mištimos; ke tu, phrala, zuriardian o ilo le svintsongo.

₈Sa anda kudia, makar ke si ma ande o Kristo sa slobodo te phenav tuke so si mai mišto, ₉mai mišto si ande o anav la milako ke me phenav tuke jekh řudjimos me o Paul, kadia sar phuro, ai vi akana řobaš le Jesus Kristosko. ₁₀Me mangav tu te kerel mištimos ka o Onesimos, kai areslo sar muřo šiav, kana me sim phanglo ande e temnitsa, ₁₁ke kaver data či sas khančesko tuke, numa akana trubul, ai tuke ai mange.

₁₂Me tradav tuke les, muře čače pořa. ₁₃Me kamlemas te ninkerav les paša mande, te služil man ande tjiro than, žikin me sim phanglo pala e Laši Viasta. ₁₄Numa, me či kamlem khanči te kerav bi te pušiav tutar, eta ke te tjiro mištimos te na avel pe zor, numa t'avel tutar korkořo.

₁₅Amburim si vo hulado tutar pe jekh tsiřa vramia, eta ke tu te garaves les pe sakda, ₁₆ai na mai sar jekh řobo, numa sar mai baro sar jekh řobo, sar jekh phral pria drago. Vo si but drago mange, ai inke mai drago tuke vi ande o mas, vi ande o Baro.

₁₇Te ninkeresa ma tu sar tjiro vortako, le sama lestar sar te les sama mandar. ₁₈Ai te kerela tuke vareso nasul, vai te kamela tuke vareso, tho les pe mande. ₁₉Me o Paul, me ramov anda muřo vast «me pokjinava,» ke žianes ke tu kames mange tjiro traio. ₂₀Ei, phrala, ke me te lav tutar kudo mištimos, ande o Baro; lašiar muřo ilo ande o Kristo.

₂₁Si ke gjinav pe tjiro patiamos ke me ramov tuke, me žianav ke tu keresa mai but de sar me phenav tuke. ₂₂Sa ande kudia vramia, lašiar mange jekh than, ke me užiarav ke me si t'avav, nais tumare řudjimaske.

₂₃O Epafras, muřo vortako phanglo ande o Jesus Kristo, ₂₄del tu pozdraimos, vi o Marko, o Aristarxo, o Demas, o Lukas, muře vortača ande e butji.

₂₅Ke o mištimos katar amaro Rai Jesus Kristo t'avel tumare duxosa!