Marko 3

₁O Jesus mai dias andre ande e khangeri židovitsko. Vo arakhlias jekhe manušes kai sas lesko vast šuko. ₂Von lenas sama pe o Jesus, te dikhen te sastiarela vo o dies o sabato; sas te thon pe leste beda. ₃Ai o Jesus phenel le manušeske kai sas lesko vast šuko: Ušti, kathe angla savořende.

₄Porme phenel lenge: Si slobodo, o dies o sabato, te keren mištimos vai te keren nasulimos, te skipis jekhe manušes vai te mudares les?

Numa von ašile mutsi.

₅Atunči, dikhel pe lende vuřitsimasa, ai vi mai nekežime anda lengo zuralimos ande o ilo, vo phenel le manušeske: Vazde tjiro vast.

Vo vazdias les, ai lesko vast sastilo. ₆Le Farizianuri ankliste avri, ai strazo von kjidinisaile le vortakonsa le Herodoske te len sama sar te xasaren les.

₇O Jesus gelotar karing e maria peske vortakonsa. Jekh baro narodo gelo pala leste anda e Galilea; ai anda e Judea, ₈ai anda o Jerusalem, ai anda o Idumea, ai anda inčial o Jordan, ai krugom katar e Tira ai o Sidon. Jekh baro narodo, sikionas so vo kerel, aven leste. ₉Vo thodias peske vortakon te ninkeren leske jekh tsinořo čuno, eta te na avel kjidino katar o narodo. ₁₀Ke, sar vo sastiarelas bute ženen, sa kudala kai sas len nasvalimata šiudenas-pe pe leste t'asban les. ₁₁Le duxuri nasul, kana von dikhenas les, denas čanga angla leste, ai tsipinas: Tu san o Šiav le Devlesko. ₁₂Numa vo delas len poronka pria zurales te na phenen kon si vo.

₁₃Vo atunči anklisto pe o plai; vo akhardias kudalen kai vo kamlias, ai von avile paša leste. ₁₄Vo alosardias deš-u-don, t'aven lesa, kai akharel le apostoluri. Ai te tradel len te phenen e Laši Viasta ₁₅ai te del len e putiaria te gonin le demonon. ₁₆Eta le deš-u-dui kai vo thodias: O Simon, kai akharel les Petri; ₁₇o Jakob, šiav katar o Zebedeo, ai o Jono, phral le Jakobosko, dias lenge o anav Boanerges, kai si kudia šiave katar o řondeto; ₁₈o Andreas; o Filipo; o Bartelemi; o Matei; o Tomas, o Jakob, šiav katar o Alfeo; o Tade; o Simon o Kananito; ₁₉ai o Juda Iskariot, kudo kai bikjindas le Jesus.

₂₀Vo gelo ande o kher, ai o narodo mai pašilo, kadia ke vo ai leske vortača naštinas te mai xan. ₂₁Le niamuri le Jesusoske, ašunde kudo, avile te len les; ke von phenenas: Lias pe avri anda e godji.

₂₂Ai le zakonaria, kai vuliste anda o Jerusalem, phenenas: Lias les o Beelzebul; si katar o prinso le demonongo ke von gonil le demonon.

₂₃O Jesus akharel le, ai phenel lenge paramičensa: Sar o Satan šai gonil vo le Satan? ₂₄T'avela jekh amperetsia huladi, kudia amperetsia naštil te ninkerel. ₂₅Ai t'avela jekh kher t'avel hulado maškar peste, kudo kher či ninkerela. ₂₆T'avela ke o Satan marel-pe pe peste, leski amperetsia si huladi, ai leski putiaria našti te žial mai angle, numa getola pe.

₂₇Khonik naštil te del andre ande o kher kai si jekh manuš zuralo ai te čorel leske mištimata, bi angla savořende te phandel kudale manušes; atunči vo čorela lesko kher.

₂₈Me phenav tumenge čačimasa, sa le bezexa avena jertime le šiavenge katar le manuš, ai le prasaimata kai von phenena; ₂₉numa kon prasala pe o Svinto Duxo či avela šoha jertime; vo si došalo pe jekh bezex merimaski.

₃₀O Jesus delas duma kadia ke von phenenas: Si ande leste jekh duxo nasul.

₃₁Avile leski dei ai leske phral, kai, bešenas avri, trade t'akharen les. ₃₂O narodo bešelas tele krugom lestar, ai phenen leske: Eta, tjiri dei ai tjire phral si avri ai akharen tu.

₃₃Ai vo del palpale: Kon si muři dei, ai kon si muře phral?

₃₄Porme, šiudias le jakha pe kudala kai bešen tele sa krugom lestar.

Eta, phenel vo, muři dei ai muře phral. ₃₅Ke, kon-godi kerel so mangel o Del, kudo si muřo phral, muři phei, ai muři dei.