Marko 14

₁O prasniko la Patradiako ai le manřengo bi-drosdake trubul t'avel pa dui dies. Le bare raša ai le zakonaria rodenas sar te daštin t'astaren le Jesus xitreniasa, ai te mudaren les. ₂Ke von phenenas: Te na avel žikin si o prasniko, eta te na avel buntuimos maškar o narodo.

₃Sar o Jesus sas ande e Betania, ande o kher katar o Simon, o nasvalo žiungalo, jekh žiuvli dias andre, žikin vo sas ka e skafidi. La sas la jekh kanta anda o albatro, kai sas andre jekh duxi anda o vužio nardo, jekh duxi pria kuč; ai, puterdias e kanta, voi dias muial e duxi pe lesko šero. ₄Uni anda kudala kai sas kothe nas lenge mišto ai phenen jekh avreske: So si lašio te xasaren kadia duxi? ₅Šai te bikjindiamas la pe mai but de trin šela dinari, ai te diam le ka le čoře.

Ai von xoliaile pe kudia žiuvli. ₆Numa o Jesus phenel: Muken la. Sostar nekežin la tume? Voi kerdias jekh laši diela karing mande. ₇Ke tumen si tume sakda čoře tumensa, ai tume šai keren lenge mištimos kana tume kamen, numa me či avava tumensa sakda. ₈Voi kerdias so šai daštisardias; voi angla savořende thodias duxi pe muřo stato te getol ma le groapoševoske. ₉Me phenav tumenge čačimasa, kai-godi e laši viasta avela phendi, ande sa e lumia, phenena ka le manuš kai dena pe godji kadia žiuvlia ai so voi kerdias.

₁₀O Juda Iskariot, jekh anda le deš-u-dui, gelo karing le bare raša, eta te del len ande o vast le Jesus. ₁₁Pala ke ašunde leste, lias len e veselia, ai phende ke den les love. Ai o Juda rodelas sar mai mišto te del les lenge.

₁₂O mai angluno dies kana xan le manře bi-drosdake ai kana šinen le bakrořen te xan le pe e Patradi, le vortača le Jesusoske phenen leske: Kai kames tu te žias te lašiaras tuke o xamos la Patradiako?

₁₃Ai vo tradias don anda peske vortača, ai phenel lenge: Žian ande o foro; tume arakhena jekhe manušes kai ningerel jekh khoro paiesko, žian pala leste. ₁₄Kai-godi vo žiala andre, phenen ka o birevo le kheresko: O Baro phenel: Kai lo o than kai me xava e Patradi muře vortakonsa? ₁₅Ai vo sikavela tumenge jekh bari soba opre, si sa gata. Kothe si te lašiaren e Patradi.

₁₆Le vortača geletar, aresle ande o foro, arakhle le dieli sar vo phendiasas lenge; ai von lašiaren e Patradi.

₁₇E riat aresli, vo avel le deš-u-donsa. ₁₈Žikin von si pala e skafidi ai kai von xan, o Jesus phenel: Me phenav tumenge čačimasa, jekh anda tumende, kai xal mansa, dela ma ande o vast.

₁₉Von len pe te nekežin, ai phenen leske, jekh pala kavreste: Me sim?

₂₀Vo del len palpale: Jekh si anda le deš-u-dui, kai thol mansa o vast ande o tiari. ₂₁O Šiav le manušesko žial-tar sar si ramome pa leste. Numa nasul t'avel le manušeske kastar o Šiav le manušesko si bikjindo! Mai mišto avilinosas kudale manušeske te na arakhadinosas.

₂₂Žikin von xan, o Jesus lias o manřo; ai pala ke řudjisardias, vo phaglias les, dias les lenge, phenelas: Xan, kado si muřo stato.

₂₃Vo lias atunči jekh taxtai; ai, pala ke řudjisardias, vo del len, ai von pile sa. ₂₄Ai vo phenel lenge: Kado si muřo rat, o rat la patiako, kai avela šiordo bute ženenge. ₂₅Me phenav tumenge čačimasa, me či mai piava šoha anda e fruta la rezaki, ži ka o dies kai me mai piava ande e amperetsia le Devleski.

₂₆Pala ke gjilabade, von gele ka o plai le Maslinengo.

₂₇O Jesus phenel lenge: Tume si sa te muken ma; ke si ramome: Me malavava le pastuřes, ai le bakroře žiantar pe sako rig. ₂₈Numa, pala ke živindiva, me žiava angla tumende ande e Galilea.

₂₉O Petri phenel leske: Makar sa le kaver mukena tu, me či mukava tu šoha.

₃₀Ai o Jesus phenel leske: Me phenav tuke čačimasa, tu, adies, inke ande kadia riat, angla savořende ke o kokošo gjilabel duvar, tu či prinžiaresa ma trivar.

₃₁Numa o Petri lias mai zurales: Kana trubula me te merav tusa, me prinžiarava tut.

Ai sa phenen sa jekh fialo.

₃₂Von gele atunči ande jekh than kai akharen les Getsemane, ai o Jesus phenel peske vortakonge: Bešen tele kathe, žikin me řudjiva.

₃₃Vo lias pesa le Petri, le Jakob ai le Jono, ai les lias les e dar ai o nekazo. ₃₄Vo phenel lenge: Muřo duxo si nekežime ži ka o merimos; bešen kathe, ai len sama.

₃₅Porme, gelo uni pašuri angle, vo šiudias pe tele pe e phuv, ai řudjil ke, te šai daštila, kudo časo te duriol lestar. ₃₆Vo phenelas: Aba, Tate, sako fialo diela tu šai keres, duriar mandar kado taxtai! Numa te avel, na so me kamav, numa so tu kames.

₃₇Ai vo avel karing le vortača, kai arakhel le sar soven, ai vo phenel le Petroske: Simon, tu soves! Tu naštisardian te les sama jekh časo! ₃₈Len sama ai řudjin, eta te na peren te zumaven tumen; o duxo zurales kamel, numa o mas si kovlo.

₃₉Vo mai duriol, ai sa kadia řudjil pe. ₄₀Vo avel palpale, ai mai arakhlias le sar soven; ke lenge jakha sas phare. Von či žianenas so te den les palpale.

₄₁Vo avilo pe e trito data, ai phenel lenge: Soven akana, ai hodinin? Si dosta. O časo avilo; eta, o Šiav le manušesko si dino ande le vast le bezexalenge. ₄₂Ušten, žias; eta, kudo kai bikjindias ma pašiol.

₄₃Ai strazo, sar vo mai delas duma, areslo o Juda, jekh anda le deš-u-dui, ai lesa jekh narodo xanřensa ai rovliansa tradino katar le bare raša, katar le zakonaria ai katar le purane. ₄₄Kudo kai bikjindias les phendiasas lenge ke del len kasavo semno: Saves me čimidava, vo si; len les, ai ningeren les sar trubul. ₄₅Sar vo areslo, vo pašiol paša o Jesus, phenelas: Rabi!

Ai vo čimidias les. ₄₆Atunči kudala žene thode o vast pe o Jesus, ai line les. ₄₇Jekh anda kudala kai sas kothe, tsirdias e xanřo, maladias la sluga katar o baro rašai, ai šindias lesko kan. ₄₈O Jesus lias e vorba, phenel lenge: Tume avilian, sar pala jekh řobaš, le xanřensa ai le rovliansa, te len ma. ₄₉Me simas sako dies maškar tumende, sikiaravas ande o templo, ai tume či lian ma. Numa si eta ke le Ramomata t'aresen.

₅₀Atunči sa mukle les, ai našle.

₅₁Jekh terno manuš gelo pala leste, sas les pe o stato jekh paplano. Line les; ₅₂numa vo muklias pesko tsolo, ai našlo sa nango.

₅₃Von ningerde le Jesus ka o mai baro rašai kai kjidinisaile sa le bare rašan, le purane ai le zakonaria. ₅₄O Petri gelo pala leste de dural ži andre ande o kimpo le mai bare rašasko; vo bešel le slugensa, ai vo tatiol paša e jag.

₅₅Le bare raša ai sa e kris e židovitsko rodenas marturon pe o Jesus, te mudaren les, ai von či arakhle. ₅₆Ke but phenenas xoxaimos pe leste numa lenge vorbi nas sar jekh fialo. ₅₇Uni uštile, ai thode falšo doš pe leste, phenenas: ₅₈Ame ašundiam ke vo phendias: Me phařavava kado templo kerdo anda o vast le manušesko, ai ande le trin dies me vazdava jekh kaver kai či avela kerdo anda o vast le manušesko.

₅₉Inke pe kudo punto so von phenen nas vorta sar trubul.

₆₀Atunči o mai baro rašai, uštilo maškar lende, pušel le Jesus, ai phenel: Či des tu khanči palpale so kadala žene phenen pe tute?

₆₁O Jesus bešlo muto, ai či del khanči palpale. O baro rašai mai pušel lestar, ai phenel leske: San tu o Kristo, o Šiav le Devlesko svintsime?

₆₂O Jesus palpale: Me sim. Ai tume dikhena le Šiaves le manušesko bešel pe e čači katar o Del o Mai Zuralo ai avela pe le nuveria le čereske.

₆₃Atunči o baro rašai šindias peske tsalia, ai phenel: So mai trubul ame martururi?

₆₄Tume ašundian o prasaimos. So miazol tumenge? Sa dine les strafo ke trubul t'avel mudardo.

₆₅Ai uni line pe te čungarden pe leste, te garaven lesko mui ai te malaven les dukhumensa, phenen leske: De pe o gor kon mardias tu!

Ai le služi line les te den les palmi.

₆₆Žikin o Petri sas tele ande o kimpo, avel jekh sluganka katar o baro rašai. ₆₇Dikhlias le Petri ke tatiol, voi dikhel pe leste, ai phenel leske: Vi tu, tu sanas le Jesusosa anda o Nazaret.

₆₈Vo xoxavel, phenelas: Me či žianav, me či hatiarav so tu phenes.

Porme vo anklisto avri te žialtar. Ai o kokošo gjilabadias. ₆₉E sluganka, dikhlias les, voi lias pe te mai phenel kudalenge kai sas kothe: Kudo si anda kudala žene.

₇₀Ai vo mai del palpale: Či sim.

Tsiřa pala kudia, kudala kai sas kothe mai phenen ka o Petri: Čačimasa tu san anda kudala žene, ke tu san anda e Galilea.

₇₁Atunči vo lias pe te prasal ai te del armaia: Me či prinžiarav kudale manušes kai tume den duma pa leste.

₇₂Strazo, pe e duito data, o kokošo gjilabel. Ai o Petri dias pe godji ka le vorbi kai o Jesus phendiasas leske: Angla savořende ke o kokošo gjilabel duvar, tu či prinžiaresa ma trivar. Ai kai delas pe godji, vo rovel.