Marko 13

₁Kana o Jesus anklisto avri anda o templo, jekh anda leske vortača phenel leske: Birevo, dikh, če bařa, ai sar si vazdine!

₂O Jesus del les palpale: Dikhes tu kado baro vazdimos? Či ašela bař pe bařeste te na avel dino muial.

₃Vo bešlo pe o plai le Maslinengo, angla o templo. Ai o Petri, o Jakob, o Jono ai o Andreas pušen lestar čorořal kadia. ₄Phen amenge, kana avela kudia, ai katar savo semno žianasa sa kudala dieli ke avena?

₅O Jesus lias pe atunči te phenel lenge: Len tume sama ke khonik te na diliarel tumen. ₆Ke but avena ande muřo anav, phenena: Me sim. Ai von diliarena buten. ₇Kana tume ašunena pa le marimata ai e viasta le marimaski, te na daran tume, ke trubul kudala dieli t'aven. Numa inke či getola pe e lumia. ₈Jekh them vazdela-pe pe jekh kaver them, ai jekh amperetsia pe jekh kaver amperetsia; avela te isdral e phuv ande uni thana, avela e bokh. Kothar lena pe le dukha.

₉Len tume sama tume. Ningerena tumen ande e kris, ai tume avena marde le rovliansa ande le khangeria židovitsko; tumen ningerena tume angla le vladori ai angla le amperatsi, pala mande, te sikaven tume. ₁₀Trubul o mai angluno ke e laši viasta t'avel phendi ka sa le thema. ₁₁Kana ningerena tumen te den tume ande le vast tumare dušmanongo, na daran so avela tume te phenen angla savořende, numa phenen so avela tumenge te phenen ka kudo časo; ke či avela tume ke dena duma, numa o Svinto Duxo. ₁₂O phral dela peske phrales ka o merimos, ai o dad peske šiaves; le glati uštena pe penge niamuri ai keren te meren. ₁₃Tume avena vuřitsime katar sa, pala muřo anav, numa kudo kai ninkerela ži ande o gor avela skipime.

₁₄Kana tume dikhena e bari griatsa ke si kothe kai či trubul t'avel — ke kudo kai gjinel te lel sama — atunči, ke kudala kai si ande e Judea te našen ande le plaia; ₁₅ke kudo kai si pe o čardako te na vulel ai te na del andre te lel vareso anda pesko kher; ₁₆ai kudo kai si ande le kimpuri te na žial palpale te lel peski bunda. ₁₇Nasul le žiuvliange kai si phare ai kudalenge kai den čuči kudo dies. ₁₈Řudjin ke kudala dieli te na aresen ivende. ₁₉Ke o pharimos, ande kudala dies, avela kadia kai inke nas dekin si e lumia kai o Del kerdias ži akana, ai ke či mai avela šoha. ₂₀Ai, te na avela ke o Baro teliarela kudala dies, khonik či naštino te trail; numa vo teliardias le, pala le manuš alome kai vo alosardias. ₂₁T'avela varekon kai phenel tumenge atunči: «O Kristo si katka» vai «Vo kathe-lo», te na patian. ₂₂Ke uštena falši Kristuri ai falši profeturi; von kerena šodo ai čudeni te diliaren le alomen, te šai daština. ₂₃Len tume sama: Me sa phendem tumenge angla savořende.

₂₄Numa ande kudala dies, pala o nasulimos, o kham kaliola, o šiunuto či mai dela peski vedaria, ₂₅le čeřaia perena anda o čeri, ai le zurale kai si ande o čeri miškina pe. ₂₆Atunči dikhena le Šiaves le manušesko sar avel pe le nuveria jekha baria zorasa ai le vestimasa. ₂₇Atunči vo tradela le andželon, ai vo kjidela le alomen pa le štar balvalia, de anda o gor la phuviako ži ka o gor le čeresko.

₂₈Sikion ai len sama katar o kopači figengo. Sar leske kaštoře aresen kovle, ai ke le patria barion, tume žianen ke o milai pašiol. ₂₉Sa jekh fialo, kana dikhena tume ke kudala dieli aresen, te žianen ke o Šiav le manušesko si paše, ka o vudar. ₃₀Me phenav tumenge čačimasa, kadia vitsa či nakhela, ke sa kadia aresela. ₃₁O čeri ai e phuv nakhena, numa muře vorbi či nakhena.

₃₂Kana avela o dies vai o časo, khonik či žianel, či le andželi ande o čeri, či o Šiav, numa o Dad ferdi. ₃₃Len tume sama, arakhen tume ai řudjin, ke tume či žianen kana kudia vramia avela. ₃₄Avela sa jekh fialo kai jekh manuš kai, žiantar pe o drom, mukel pesko kher, thol bare pe leste peske slugen, del sakones so te kerel, ai del ordina ka o vudarari te lel sama. ₃₅Len sama, ke tume či žianen kana avela o birevo le kheresko, vai e riat, vai maškar e riat, vai kana gjilabel o kokošo, vai diminiats. ₃₆Daran ke vo arakhel tume ke soven, kana vo avela strazo. ₃₇So me phenav tumenge, me phenav les savořenge: Arakhen tume.