Matei 24

₁Sar o Jesus žialastar avri anda o templo, leske vortača pašile te sikaven leske sar si kerdo.

₂Numa vo phenel lenge: Dikhen tume sa kado? Me phenav tumenge čačimasa, či bešela kathe bař pe bařeste te na perel.

₃Vo bešel pe o plai katar le Maslini. Ai le vortača aven ferdi von leste te pušen les: Phen amenge, kana kudia avela, ai savo avela o semno kana avesa ai getola pe e lumia?

₄O Jesus del len palpale: Len tume sama te na khonik te na diliarel tume. ₅Ke but avena ande muřo anav, phenena: Me sim o Kristo. Ai von diliarena bute ženen. ₆Tume ašunena ke den duma pa le marimata ai e viasta le marimaski; len tume sama te na daran, ke trubul kudala dieli t'aresen. Numa inke či getola pe e lumia. ₇Jekh them vazdela-pe pe jekh kaver them, ai jekh amperetsia pe jekh kaver amperetsia, ai avena, ande but thana, bokha ai isdrala e phuv. ₈Sa kudia si ferdi ke len pe le dukha.

₉Atunči dena te kjinuin tume, ai mudarena tumen; ai tume avena vuřitsi sa le themenge, pala muřo anav. ₁₀Kadia but perena ai von puřina pe, vuřitsina jekh kavres. ₁₁But falši profeturi vazdena pe, ai diliarena bute ženen. ₁₂Ai, ke e bezex butiola, e mila butengi šudriola. ₁₃Numa kudo kai ninkerela ži ande o gor avela skipime. ₁₄Kadia laši viasta la amperetsiaki avela phendi pe sa e lumia, t'avel marturo ka sa le thema. Atunči avela te getol pe e lumia.

₁₅Sa anda kudia, kana tume dikhena e bari griatsa, kai dias duma latar o profeto Daniel, thodini ande o than svinto, — ke kudo kai gjinel te lel sama! ₁₆Atunči sa kudala kai si ande e Judea našena ande le plaia. ₁₇Ke kudo kai si pe o čardako te na vulel tele te lel so si lesko ande o kher. ₁₈Ai ke kudo kai si ande le kimpuri te na avel palpale te lel peski bunda. ₁₉Nasul t'avel le žiuvliange kai ažiukeren glati ai kudalenge kai den čuči ande kudala dies! ₂₀Řudjin ke te tumaro našimos te na avel ivende, či jekh dies sabato. ₂₁Ke atunči, tumaro nekazo avela baro kai nas inke kadia dekin si e lumia ži akana, ai ke či mai avela kadia šoha. ₂₂Ai, te na kamlinosas o Del te teliarel kudala dies, khonik či naštino te trail; numa pala le manuš kai alosardias, kudala dies avena mai tsiřa.

₂₃T'avela varekon ke phenel tumenge atunči: O Kristo si katka, vai: Kathe lo, te na patian tume. ₂₄Ke uštena falši Kristuri ai falši profeturi; von kerena bare šodimata ai čudeni, kadia te diliaren, te šai daštin, inke le alomen. ₂₅Eta, me phendem tumenge angla savořende.

₂₆T'avela te phenen tumenge: Eta, vo si ande e pusta, na žian; eta, vo si ande e soba, na patian len. ₂₇Ke, sar o strefiaimos avel pa e rig e čači ai sikadiol ži pe e rig e stingo, kadia aresela kana avela o Šiav le manušesko. ₂₈Ande savo than kai avela stato mulesko, kothe kjidena pe le uluri.

₂₉Strazo pala kudala dies nekežime, o kham tamlola, o šiunuto či mai dela peski vedaria, le čeřaia perena anda o čeri, ai le zora le čereske miškina pe. ₃₀Atunči o semno katar o Šiav le manušesko sikadiola ande o čeri, sa le kumpani la phuviake vatina pe, ai dikhena sar o Šiav le manušesko avela pe o nuvero le čeresko zorasa ai bare vestimasa. ₃₁Vo tradela peske andželon ekha bari tuturiazasa, ai von kjidena le alomen pe le štar balvalia, de katar jekh gor le čeresko ži ka o kaver gor.

₃₂Sikion tume te keren sar si o kopači figengo. Sar leske kaštoře aresen kovle, ai ke le patria barion, tume prinžiaren ke o milai pašiol. ₃₃Sa jekh fialo, kana tume dikhena sa kudala dieli, te žianen ke o Šiav le manušesko pašiol ka o vudar. ₃₄Me phenav tumenge čačimasa, kadia vitsa či nakhela, ke sa kudia si t'aresel. ₃₅O čeri ai e phuv nakhena, numa muře vorbi či xasavona.

₃₆Kana avela kudo dies ai kudo časo, khonik či žianel, či le andželi anda o čeri, či o Šiav, numa ferdi o Dad. ₃₇So areslo ande e vramia kana sas o Noa, sa kadia aresela kana avela o Šiav le manušesko. ₃₈Ke, ande le dies angla savořende o baro pai kai tasadias sa, le manuš xanas ai penas, ansurinas pe ai ansurinas penge šiaven, ži ka o dies kai o Noa dias andre ande o čuno; ₃₉ai von či gindinas pe ka khanči, žikin či o baro pai avilo ai tasadias le sa: Sa kadia avela kana avela palpale o Šiav le manušesko. ₄₀Atunči, anda le dui manuš kai si pe o kimpo, jekh avela lino ai o kaver muklo. ₄₁Katar le dui žiuvlia kai inčaren pe o ašav, jekh avela lini ai e kaver mukli. ₄₂Len tume sama, ke tume či žianen če dies o Baro avela. ₄₃Te žianen mišto, te o birevo le kheresko žianelas ka če časo la ratiako avela o čor, vo lela sama ai či mukela te phagen lesko kher. ₄₄Sa anda kudia, vi tume, len tume sama, ke o Šiav le manušesko avela ande o časo kai tume či dena tume godji.

₄₅Savo si e sluga čači ai kai lel pe sama, kai lesko birevo thodias les baro pe peske žene, te del len te xan kana trubul e vramia? ₄₆Veselo t'avel kudia sluga, kai lesko birevo, kana aresela khere, arakhel les ke kerel kadia! ₄₇Me phenav tumenge čačimasa, vo thola les baro pe sa peske mištimata. ₄₈Numa, t'avela jekh nasul sluga, kai phenel ande peste: Muřo birevo či avela sigo, ₄₉ai vo lel pe te marel peske vortakon, te xal vo ai te pel le matensa. ₅₀O birevo kudala slugako avela o dies kai vo či ažiukerel les ai o časo kai vo či žianel. ₅₁Vo šinela les kotora, ai dela les leski partia le athaitoriensa: Kothe avena le roimata ai grintsina le dand.