Matei 22

₁O Jesus, lias e vorba, del duma lensa pale ande le paramiča, ai vo phenel: ₂E amperetsia le čereski si jekh fialo sar jekh amperato kai kerel abiav peske šiaveske. ₃Vo tradias peske slugen t'akharen le goston ka o abiav; numa von či kamle t'aven. ₄Vo mai tradias kavre slugen, phenelas: Phenen le gostonge: Eta, me lašiardem muři pativ; muře guruva ai muře žigeni thule mudardiam le, sa si gata, aven ka o abiav. ₅Numa, bi te len sama ke si akharde, von geletar, kako ka pesko kimpo ai kako ka peski butji. ₆Ai le kaver line le slugen, dine le pe o lažiav ai mudarde le. ₇O amperato xoliailo; vo tradias peske ketanen, kerdias te meren kudalen kai mudarde, ai phabardias lengo foro. ₈Atunči vo phenel ka peske služi: O abiav si gata; numa le gosti nas leske harniči. ₉Žian kai le droma kai anklen katar o foro, ai akharen ka o abiav sa kudalen kai tume arakhena. ₁₀Kudala služi gele pe le vurmi, kjidine sa so von arakhle, nasul ai laše, ai e sala le abiaveski pherdili gosti.

₁₁O amperato dias andre te dikhel kon si ka e skafidi, ai dikhlias kothe jekhe manušes kai nas pe leste jekh tsolo abiavesko. ₁₂Vo phenel leske: Muřo vortako, sar dian tu kathe bi t'avel pe tute jekh tsolo abiavesko? Kudo manuš sas lesko mui phandado. ₁₃Atunči o amperato phenel le slugenge: Phanden leske punře ai leske vast, ai šiuden les ande o tuniariko avri, kai si le roimata ai grintsin le dand. ₁₄Ke but avena akharde, numa tsiřa alome.

₁₅Atunči le Farizianuri gele te den pe duma sar te len le Jesus katar leske vorbi. ₁₆Von trade paša leste penge vortakon manušensa ande e partida katar o Herod, kai phenenas: Baria, ame žianas ke tu san čačo, ai ke tu sikiares e vurma le Devleski sar si o čačimos, bi te les sama khanikastar, ke tu či dikhes sar si o manuš. ₁₇Phen amenge so miazol tuke, si slobodo, vai niči, te pokjinas love ka o Amperato?

₁₈O Jesus, žianelas lengo nasulimos, del palpale: Sostar zumaven man tume, athaitoria? ₁₉Sikav mange o lov xurdo savesa tu pokjines so trubul.

Ai von sikaven leske jekh dinaro.

₂₀Vo mangel lendar: Kasko si kako vobrazo ai kako ramomos?

₂₁Katar o Amperato, den von palpale: Atunči vo phenel lenge: Den ka o Amperato so si ka o Amperato, ai ka o Del so si ka o Del.

₂₂Šodo lenge so von ašunde, von mukle les, ai gele-tar.

₂₃Sa kudo dies, le Sadusenuri, kai phenenas ke nai živindimos, avile paša o Jesus, ai pušel les kadia: ₂₄Birevo, o Moše phendias: Te mulo varekon bi t'avel les šiave lesko phral lela leska phivlia, ai avela te del šiaven peske phraleske. ₂₅Eta, sas maškar amende efta phral. O mai angluno ansurisailo, ai mulo; ai, sar nas les glati, muklia peska řomnia ka pesko phral. ₂₆Sa jekh fialo sas ka o duito, porme o trito, ži ka o eftato. ₂₇Pala lende, vi e žiuvli muli. ₂₈Kana živindina, saveske anda le efta avela voi e řomni? Ke voi sas savořengi.

₂₉O Jesus del len palpale: Tume šibin tume, ke tume či hatiaren o Ramomos, či e zor le Devleski. ₃₀Ke, kana živindina, le manuš či lena řomnia, či le řomnia či lena řomen, numa von avena sar le andželi le Devleske ande o čeri. ₃₁Pe so si ke živindin pe le mule, či gjindian tume so phendias tumenge o Del: ₃₂Me sim o Del katar o Abraham, o Del katar o Isak, ai o Del katar o Jakob? O Del nai o Del le mulengo, numa le živindengo.

₃₃O narodo, kai ašunelas, sas lengo šodo sar sikiarelas o Jesus.

₃₄Le Farizianuri, ašunde ke vo kerdias t'ašen mutsi le Sadusenuri, kjidinisaile, ₃₅ai jekh anda lende, zakonari, pušel les kadia te zumavel les: ₃₆Baria, savi si e mai bari poronka le Zakonoski?

₃₇O Jesus del les palpale: T'avel tuke drago tjiro Baro, tjiro Del, anda sa tjiro ilo, anda sa tjiro duxo ai anda sa tjiri godji. ₃₈Si e mai angluno ai e mai bari poronka. ₃₉Ai eta e duito, kai si jekh fialo: T'avel tuke drago tjiro vortako sar san drago tuke. ₄₀Anda kadala dui poronki aven sa o Zakono ai le profeturi.

₄₁Sar le Farizianuri sas kjidine, o Jesus pušel lendar. ₄₂Phenelas: So den tume godji tume pa o Kristo? Kasko šiav si vo?

Von den les palpale: Le Davidosko.

₄₃Ai o Jesus phenel lenge: Sar o David, kana miškilas les o Duxo, akharel les vo Baria, kana phenel:

₄₅T'akharela les o David Baria, sar si vo lesko šiav?

₄₆Khonik naštisardias te del les palpale jekh vorba. Ai, de katar kudo dies, khonik či mai tromal te pušel les.