Matei 18

₁Ande kudia vramia, le vortača pašile paša o Jesus, ai phenen: Kon si o mai baro ande e amperetsia le čereski?

₂O Jesus, akhardias jekhe tsinoře šiavořes, thodias les maškar lende, ₃ai phenel: Me phenav tumenge čačimasa, te na tume pařuven tume ai tume te na aresen sar le tsinoře šiavoře, tume či dena andre ande e amperetsia le čereski. ₄Sa anda kudia, varekon kai mukela pe prosto sar kado tsinořo šiavořo avela o mai baro ande e amperetsia le čereski.

₅Ai kon-godi lela ande muřo anav jekhe tsinoře šiavořes, sar kado, lel man. ₆Numa, varekon te peravela jekhes anda kadala tsinoře kai patian pe ande mande, mai mišto avilinosas leske ke te phanden ka leski koř jekh bař ašavesko, ai te šiuden les ande o fundo la mariako. ₇Če nasul la lumiake ke si kasave dieli kai ningeren le manušen ka e bezex! Musai t'aven kasave dieli; numa nasul t'avel le manušeske ke kerel le!

₈T'avela tjiro vast vai tjiro punřo ke šai peres ande e bezex pala leste, šin les ai šiude les dur tutar; mai mišto tuke te des andre ande o traio bango vai jekhe vastesa, ke t'avel tu dui punře vai dui vast ai t'aves šiudino ande e jag pe sakda. ₉Ai t'avela tjiri jakh ke si tuke te šai peres ande e bezex pala late, ankalav la avri ai šiude la dur tutar; mai mišto tuke te des ande o traio, jekha jakhasa, ke t'avel tu dui jakha ai t'aves šiudino ande e jag phabardi.

₁₀Len tume sama te na vuřitsin jekhes ferdi anda kadala tsinoře; ke me phenav tumenge ke lenge andželi ande o čeri dikhen sakda e fatsa muře Dadeski kai si ande o čeri. ₁₁Ke o Šiav le manušesko avilo te skipil so sas xasardo.

₁₂So gindin tume? Te si jekh manuš ke si les jekh šel bakroře, ai ke jekh anda lende xasavol, či mukela vo le inia-var-deš ai inia pe o plai, te žial te rodel kudales kai xasailo? ₁₃Ai, t'arakhela les vo, me phenav tumenge čačimasa, les avela mai but veselia anda kudo bakrořo sar anda le inia-var-deš ai inia kai či xasaile. ₁₄Sa jekh fialo, nai ke kamel tumaro Dad kai si ande o čeri te xasavol jekh anda kadala mai tsinoře.

₁₅T'avel ke tjiro phral kerdias bezex pe tute, žia ai de lesa duma, tu ai vo korkoře. T'ašunela tute, tu nirisardian tjire phrales. ₁₆Numa, te na ašunela tute, le tusa jekhe vai do ženen, eta ke sa e diela te lašiardiol pe so phenen dui vai trin martururi. ₁₇Te na kamela t'ašunel len, phen les ka e khangeri, ai te na kamela t'ašunel e khangeri, t'avel tuke sar jekh kai či patial ai jekh kai kjidel e taksa.

₁₈Me phenav tumenge čačimasa, sogodi tume phandena pe e phuv avela phanglo ande o čeri, ai sogodi tume putrena pe e phuv avela puterdo ande o čeri.

₁₉Me mai phenav tumenge, te si ke dui anda tumende thon pe ande jekh than pe e phuv te mangen jekh diela vareso, voi avela tumenge dini katar muřo Dad kai si ande o čeri. ₂₀Ke kothe kai dui vai trin si kjidine ande muřo anav, me sim maškar lende.

₂₁Atunči o Petri pašilo paša leste, ai phenel: Baria, sodivar jertiva me muře phraleske, kana kerela doš pe mande? Ži ka efta datsi?

₂₂O Jesus phenel leske: Me či phenav tuke ži ka efta datsi, numa ži ka efta-var-deš var efta datsi. ₂₃Sa anda kudia, e amperetsia le čereski si jekh fialo sar jekh amperato kai manglias te žianel sode kamenas leske leske služi. ₂₄Kana vo lias pe te gjinel, andine leske jekhes kai kamelas leske deš mii teliaria. ₂₅Sar nas les so šai te pokjinel, lesko birevo dias ordina te bikjinen les, les, leska řomnia, leske šiaven, ai sogodi sas les, ai ke o užilimos t'avel pokjindo. ₂₆E sluga šiudias-pe pe čangende angla leste, ai phenel: Baria, te ažiukeres, me pokjinava tuke sa. ₂₇O birevo kudala slugako lias les e mila, muklias les te žialtar, ai muklias lesko užilimos.

₂₈Kana vo gelo avri, kudo sluga arakhlias jekhes anda peske vortača kai kamelas leske šel dinari. Vo lias les kořatar, phenelas: Pokjin so kames mange. ₂₉Lesko vortako šiudias pe tele pe e phuv, řudjilas pe, phenelas: Ažiuker ai me pokjinava tuke. ₃₀Numa o kaver či kamlias, ai gelo te šiudel les ande e temnitsa, žikin či pokjinela so kamel leske. ₃₁Leske vortača dikhle so areslias, sas but nekežime, ai von gele te phenen ka o birevo sa sogodi nakhlias. ₃₂Atunči o birevo akhardias kudala sluga, ai phenel leske: Nasul sluga, me dem tu palpale sa so kamesas mange, ke tu řudjisailian mande. ₃₃Nas t'avel vi tuke mila anda tjiro vortako, sar mange sas mila anda tute? ₃₄Ai lesko birevo xoliariko dias les ka kudala kai maren žikin či pokjinela sa so vo kamel leske.

₃₅Sa kadia muřo Dad anda o čeri kerela kadia anda tumende, te na sako anda tumende či jertila peske phraleske anda sa pesko ilo.