Matei 14

₁Ande kudia vramia O Herodo o tetrarxo, ašundias so den duma pa o Jesus, phenel peske slugenge: Si o Jono kai bolel! ₂Vo živindinisailo anda le mule, anda kudia si ke si lestar čudeni.

₃Ke o Herodo phandadias le Jono, phanglias les ai thodias les ande e temnitsa, pala e Herodias, e řomni le Filiposki, lesko phral, ₄ke o Jono phendiasas leske: Nai tuke slobodo te les la tuke řomni.

₅Vo kamelas te mudarel les, numa daralas katar o narodo, ke von dikhenas pe o Jono sar jekh profeto. ₆Eta, kana vestisarde o dies kai arakhadilo o Herodo, e šei katar e Herodias kheldias maškar le gosti, ai kerdias veselo le Herodo, ₇kadia ke vo dias peski vorba te del la sa sogodi voi mangel. ₈Sar sikiardias la laki dei, voi phenel: De ma kathe, pe jekh tiari, o šero le Jonosko.

₉O amperato nekežisailo, pala peski solax ai pala peske gosti, vo dias poronka te den les lake. ₁₀Ai vo tradias te šinen o šero le Jonosko ande e temnitsa. ₁₁Lesko šero andine les pe jekh tiari, ai dine les ka e šei terni kai ningerdias les ka peski dei. ₁₂Le vortača le Jonoske avile te len lesko stato, ai angroposarde les. Ai von gele te phenen kudia ka o Jesus.

₁₃Ka kudia viasta, o Jesus gelotar kothar ande jekh čuno, te bešel korkořo ande jekh than pusto; ai o narodo ašundias kudia, anklisto anda o foro ai gelo pala leste tele. ₁₄Kana vo anklisto avri anda o čuno, vo dikhlias jekh baro narodo, ai lias les e mila lendar, ai vo sastiardias le nasvalen.

₁₅Avili e riat, le vortača pašile paša leste, ai phenen: Kado than si pusto, ai o časo si vuže dur; trade o narodo, eta te žian ande le gava, te kjinen penge te xan.

₁₆O Jesus del len palpale: Či trubul te žiantar; den le tume te xan.

₁₇Numa von phenen leske: Amen si ame ferdi panž manře ai dui maše.

₁₈Ai vo phenel: Anen len mange.

₁₉Vo thodias te bešel o narodo pe e čar, lias le panž manře ai le dui maše, ai, vazdias le jakha karing o čeri, vo naisardias. Porme, vo phaglias le manře ai dias le ka le vortača, kai dine le ka o narodo. ₂₀Sa xale ai pravardile, ai andine deš-u-dui košnitsi pherde kotora kai ašile. ₂₁Kudala kai xale sas pašte panž mii manuš, bi le žiuvliango ai le šiavořengo.

₂₂Strazo pala kudia, thodias zor pe le vortača t'anklen ande o čuno ai te nakhen pe e kaver rig angla savořende lestar, žikin vo tradel o narodo. ₂₃Kana vo tradias le, vo anklisto pe o plai, te řudjil rigate; ai, sar e riat avili, vo sas kothe korkořo. ₂₄O čuno sas dur katar e phuv, malavenas les le talazuri; ke e balval sas pe e kaver rig. ₂₅Angla savořende te uštel o dies, o Jesus gelo karing lende, phirelas pe o pai. ₂₆Kana le vortača dikhle ke vo phirel pe e maria, von isdraile, ai phenen: Si jekh čoxano!

Ai, ande lengi dar, von tsipin. ₂₇O Jesus phenel lenge strazo: Len tume sama, me sim; na daran!

₂₈O Petri del palpale: Baria, t'avesa tu, de ordina ke me te žiav karing tute pe o pai.

₂₉Ai vo phenel: Aidi!

O Petri anklisto avri anda o čuno, ai phirel pe o pai, te žial karing o Jesus. ₃₀Numa, dikhlias ke e balval si zurali, lias les e dar; ai, sar lelas pe te del andre, vo tsipil: Baria, skipisar ma!

₃₁Strazo o Jesus thodias o vast, lias les, ai phenel leske: Manuš kai si tu tsiřa patiamos, sostar či patiailian?

₃₂Ai von ankliste ande o čuno, ai e balval ašili. ₃₃Kudala kai sas ande o čuno avile te den čanga angla o Jesus, ai phenen: Tu sas čačimasa o Šiav le Devlesko.

₃₄Kana nakhle e maria, von avile ande o them o Genesaret. ₃₅Le žene anda kudia rig, prinžiarde le Jesus, trade ženen ande sa so si krugom te phenen e viasta, ai andine leske sa le nasvalen. ₃₆Von řudjin pe te mukel le ferdi t'asban o kotor katar lesko tsolo. Ai sa kudala kai asbade les sastile.