Matei 11

₁Kana o Jesus getosardias te sikiarel peske deš-u-do vortakon, vo gelotar kothar, te sikiarel ai te del duma ande le foruri le themeske.

₂O Jono, ašundias ande peski temnitsa so kerel o Kristo, tradias peske vortakon te phenen leske: ₃San tu kudo kai trubul t'avel, vai trubul ame t'ažiukeras avres?

₄O Jesus del len palpale: Žian ningeren ka o Jono so tume ašundian ai so tume dikhlian: ₅Le koře dikhen, le bange phiren, le žiungale nasvale vužion, le kašuke ašunen, le mule živindisavon, ai e laši viasta si phendi ka le čoře. ₆Veselo t'avel kudo kai či mukela pesko patiamos pala mande!

₇Sar von žianastar, o Jesus thodias pe te phenel le narodoske, pe so si o Jono: So gelian tume te dikhen ande e pusta? Jekh kaštořo kai miškil les e balval? ₈Numa, so gelian tume te dikhen? Jekh manuš uriado ande le tsalia kuč? Eta, kudala kai si le tsalia kuč si ande le khera le amperatonge. ₉So gelian tume te dikhen? Jekh profeto? Ei, me phenav tumenge, mai but sar jekh profeto. ₁₀Ke si kudo kai si pa leste ramome: Eta, me tradav muřes mai angle kai phenel angla tjiri fatsa, te lašiarel tjiri vurma angla tute. ₁₁Me phenav tumenge čačimasa, maškar kudala kai arakhadile katar jekh žiuvli, nas mai baro sar o Jono kai boldias. Numa, o mai tsinořo ande e amperetsia le čereski si mai baro lestar. ₁₂De katar e vramia katar o Jono kai boldias ži akana, e amperetsia le čereski si phagli, ai si le nasul kai len la zurales. ₁₃Ke sa le profeturi ai o Zakono phende ži ka o Jono; ₁₄ai, te kamena tume te hatiaren, vo si o Elia kai trubulas t'avel. ₁₅Kudo kai si les kan t'ašunel ašunela.

₁₆Sar te sikavav me kadia vitsa? Voi miazol sar šiavoře kai bešen pe o than narodosko, ai kai den duma ka le kaver šiavoře. ₁₇Phenen: Ame gjilabadiam ande e tuturiaza, ai tume či kheldian; ame gjilabadiam gjilia milosi, ai tume či vatisailian. ₁₈Ke o Jono avilo, či xalas ai či pelas, ai von phende: Vo si jekh bengailo. ₁₉O Šiav le manušesko avilo, xalas ai pelas, ai von phende: Vo si xamatori ai kai pel, jekh vortako kudalenge kai kjiden e taksa ai le narodosko kai si nasul. Numa o godiaverimos sas sikado pala so kerdias.

₂₀Atunči vo lias pe te phenel pe le foruri ande save sas mai but čudeni, ke von či keisaile. ₂₁Nasul tuke Horazin! Nasul tuke, Betsaida! ke, te le čudeni kai sas sikade maškar tumende sas kerde ande e Tira ai ande o Sidon, de dumult sas te kein pe, sas te len pe pende o gono ai šiuden le pulberia te garaven pen lažiavestar. ₂₂Sa anda kudia me phenav tumenge: O dies la krisako, e Tira ai o Sidon avena mai tsiřa pharo pe lende sar pe tumende. ₂₃Ai tu, Kapernaum, avesa tu uštiado ži ka o čeri? Tu avesa teliardo ži kai bešen le mule; ke, le čudeni kai sas sikade maškar tute t'avilinosas sikade ande o Sodomo, sas te mai ašel vo adies. ₂₄Sa anda kudia me phenav tumenge: O dies la krisako, o them o Sodomo avela mai tsiřa pharo pe leste sar pe tumende.

₂₅Ande kudia vramia, o Jesus lias e vorba, ai phenel: Me luvudiv tuke, Tate, Baria pe o čeri ai pe e phuv ke tu garadian kadala dieli ka kudala kai žianen ai si godiaver, ai ke tu sikadian le ka le šiavoře. ₂₆Ei, Tate, me luvudisarav tu ke tu kamlian kadia.

₂₇Sa kadala dieli sas mange dine katar muřo Dad, ai khonik či žianel le Šiaves, te na avilinosas o Dad; vi khonik či žianel le Dades te na avilinosas o Šiav ai kudo kaske o Šiav kamel te sikavel les.

₂₈Aven mande, tume sa kai san kjinuime ai kai si tumenge pharo, ai me dava tumen te hodinin. ₂₉Len pe tumende muřo pharimos ai sikion mandar, ke me sim kovlo ai prosto ande o ilo; ai tume arakhena hodina tumare duxonge. ₃₀Ke muřo pharimos si kovlo, so si pe tumende vušořo.