Matei 10

₁Porme, akhardias peske deš-u-do vortakon, vo dias len e putiaria te gonin le duxuri bi-vuže, ai te sastiaren sa le nasvalimata ai sa le bangimata. ₂Eta le anava katar le deš-u-dui vortača: O mai angluno, o Simon, akharen les Petri, ai o Andreas, lesko phral; o Jakob, šiav katar o Zebedeo, ai o Jono, lesko phral; ₃o Filipo, ai o Bartelemi; o Tomas, ai o Matei, kai kjidel e taksa, o Jakob, šiav katar o Alfeo, ai o Tade; ₄o Simon o Kananito, ai o Juda Iskariot, kudo kai bikjindias les.

₅Kadia si le deš-u-dui kai o Jesus tradias, kana sikiardias le kadia: Na žian karing kudala kai či patian, ai na den ande le foruri kai si le Samaritanuri. ₆Žian mai mišto karing le bakroře le xasarde katar o kher anda o Israel. ₇Žian, den duma, ai phenen: E amperetsia le čereski si paše. ₈Sastiaren le nasvalen, živindin le mulen, vužaren le žiungale nasvalen, gonin le demonon. Tume lian ivia, den ivia. ₉Na len tumensa sunakai, či rup, či lov, ande tumare prasti; ₁₀či gono kana žian, či dui bundi, či papuča, či rovli; ke o butiari trubul te niril pesko xamos.

₁₁Ande varesavo foro vai gav kai tume den andre, pušen tume t'avela varekon harniko kai šai žian leste, ai bešen leste žikin či žiantar. ₁₂Kana dena andre ande o kher, den pozdraimos; ₁₃ai, t'avel o kher pativalo, ke tumari patia t'avel pe leste; numa te na avela pativalo, ke tumari patia t'amboldel pe tumende. ₁₄Kana či lena tumen ai ke či ašunen tumare vorbi, anklen avri anda kudo kher vai anda kudo foro ai khosen e pulberia pa tumare punře. ₁₅Me phenav tumenge čačimasa: O dies kai avela e kris, o them e Gomořa ai o Sodomo avela dino pe kris mai tsiřa katar kudo foro.

₁₆Eta, me tradav tumen sar bakroře maškar le ruva. Len tume sama sar le sap, ai aven kovle sar le gulumbia. ₁₇Len tume sama katar le manuš; ke von dena tumen ka le krisa, ai von marena tumen řaiansa ande penge khangeria židovitsko. ₁₈Tumen ningerena tumen pala mande, angla le vladoruri ai angla le amperatsi, t'aven martururi lenge ai kudalenge kai či patian. ₁₉Numa, kana dena tumen ka le krisa, te na len sama sar tume dena duma vai so si te phenen; so avela tumen te phenen avela tumen dino ka kudo časo; ₂₀ke či avela tume ke den duma, numa o duxo tumare Dadesko dela duma ande tumende.

₂₁O phral dela peske phrales ka o merimos, ai o dad peske šiaves; le šiave buntuina-pe pe penge niamuri, ai mudarena len. ₂₂Tume avena vuřitsime savořendar, pala muřo anav; numa kudo kai ninkerela ži ande o gor avela skipime. ₂₃Kana marena tumen ande jekh foro, našen ande jekh kaver. Me phenav tumenge čačimasa, tume či getona te nakhen sa le foruri anda o Israel, ke o Šiav le manušesko avela.

₂₄O vortako nai vo mai but sar o birevo, či e sluga mai but sar o baro. ₂₅Trubul ferdi ke o vortako te kerel anda leste sar o birevo, ai e sluga sar lesko baro. T'akharde von le birevos Beelzebul, sar mai but akharena von kadia le ženen anda o kher.

₂₆Te na daran tume lendar, ke nai khanči garado te na avela sikado, či thodino rigate te na avela žianglo. ₂₇So me phenav tumenge ande o tuniariko phenen les tume ande e vedaria le dieseski, ai so si tumenge phendo ka o kan, den duma pa leste pe le čardakuri. ₂₈Na daran kudalendar kai mudaren o stato ai kai naštin te mudaren o duxo; daran mai sigo katar kudo kai šai mudarel o duxo ai o stato ande e jag le merimaski. ₂₉Či bikjinen dui čirikliořa pe jekh šuv? Numa, či perel jekh pe e phuv bi te na kamel tumaro Dad. ₃₀Ai inke le bal tumare šereske si gjinde. ₃₁Te na daran tume: Tume san but mai but sar le čirikliořa.

₃₂Sa anda kudia, kon-godi del duma pa mande angla le manuš, vi me dava duma pa leste angla muřo Dad kai si ande o čeri. ₃₃Numa kudo kai phenel angla o narodo ke či prinžiarel ma, vi me phenav angla muřo dad kai si ande o čeri ke me či prinžiarav les.

₃₄Na gindin tumen ke me avilem t'anav e patia pe e phuv; me či avilem t'anav e patia, numa jekh xanřo. ₃₅Ke me avilem te hulavav maškar o manuš ai lesko dad, maškar e šei ai laki dei, maškar e bori ai laki sakra. ₃₆Ai o manuš avena les dušmane le žene anda lesko kher.

₃₇Kudo kai kamel peske dades vai peska da mai but sar man nai harniko mange, ai kudo kai kamel peske šiaves vai peska šeia mai but sar man nai harniko mange; ₃₈kudo kai či lel pesko trušul, ai či avel pala mande, nai harniko mange. ₃₉Kudo kai arakhel pesko traio xasarela les, ai kudo kai xasarel pesko traio pala mande arakhela les.

₄₀Kudo kai lel tu lel man, ai kudo kai lel man lel kudales kai tradias man. ₄₁Kudo kai lel jekhe profetos sar ke si jekh profeto avela pokjindo sar jekh profeto, ai kudo kai lel jekhe vortos ke si vorta avela les jekh pokjinimos vorta. ₄₂Ai varekon kai dela ferdi jekh taxtai pai šudro ka jekh anda kudala tsikne kai si muřo vortako, me phenav tumenge čačimasa, vo či xasarela pesko pokjinimos.