Lukas 5

₁Sar o Jesus bešelas paša e maria o Genesaret, ai ke o narodo kjidelas pe krugom leste t'ašunen e vorba le Devleski, ₂vo dikhlias pe o berego la mariako dui čunuri, pa save le mašaria vuliste te xalaven penge setki. ₃Vo anklisto ande jekh anda kudala čunuri, kai sas le Simonosko, ai řudjisailo lestar te duriol tsiřa katar e phuv. Porme vo bešlo tele, ai anda o čuno vo sikiarel o narodo.

₄Kana vo getosardias te del duma, vo phenel ka o Simon:

Žian angle maškar o pai, ai šiuden tumare setki t'astaren maše.

₅O Simon dias les palpale:

Birevo, ame kerdiam butji sa e riat bi te las khanči; numa pala tjiri vorba, me šiudava e setka.

₆Šiudias la, von line but maše, ai lengi setka šindiolas. ₇Von keren semnuri penge vortakonge kai sas ande o kaver čuno t'aven te ažutin len, ai von pherde le dui čunuri, ži kai šai tasonas. ₈Kana dikhlias kudia, o Simon Petri pelo ka le čanga le Jesusoske ai phenel:

Baria, žiatar mandar, ke me sim jekh manuš bezexalo.

₉Ke e dar lias les, les ai sa kudalen kai sas lesa, pala o astarimos kai sas len. ₁₀Sa jekh fialo sas ka o Jakob ai ka o Jono, šiave katar o Zebedeo, kai sas ande jekh than le Simonosa. Atunči o Jesus phenel le Simonoske:

Na dara; d'akanara tu astaresa le manušen.

₁₁Ai, andine le čunuri pe e phuv, von mukle sa, ai gele pala leste.

₁₂O Jesus sas ande jekh foro, ai eta, jekh manuš pherdo nasulimos žiungalo, dikhlias les, pelo pe peski fatsa, ai kerdias leske kako řudjimos:

Baria, te kamesa, tu šai vužares man.

₁₃O Jesus vazdias o vast, asbadias les, ai phenel: Me kamav, av vužio.

Strazo o žiungalimos muklias les.

₁₄Porme dias les ordina te na phenel khanikaske. Numa, phenel vo, žia sikav tu ka le raša ai de pala tjiro vužimos so o Moše phendias, eta t'aves lenge marturo.

₁₅Lesko vestimos žial sar mai but ai mai but, ai le žene avenas — baro narodo — t'ašunen leste ai t'aven saste lestar. ₁₆Numa vo gelo ande e pusta te řudjisarel.

₁₇Jekh dies o Jesus sikiarelas. Le Farizianuri ai le zakonaria bešenas kothe, avile anda sa le gava anda e Galilea, anda e Judea ai anda o Jerusalem; ai e zor le Bareski sikavel pe katar le sastiarimata. ₁₈Ai eta, žene, ningeren pe jekh pato jekhe paralitikos, rodenas te den les andre ai te thon les angla leske jakha. ₁₉Sar či žianenas katar te ningeren les, ke sas jekh baro narodo, von ankalade les pe o čardako, ai von vuliarde les katar jekh puterimos, leske patosa, maškar sa kai si kjidine, angla o Jesus. ₂₀Dikhlias lengo patiamos, o Jesus phenel:

Manuš, tjire bezexa si jertime.

₂₁Le zakonaria ai le Farizianuri thode pe te den pe godji ande pende:

Kon si kado, kai prasal? Kon šai jertil le bezexa, te na avela o Del?

₂₂O Jesus, žianelas lenge ginduri, lias e vorba ai phenel lenge:

Če ginduri si tumen ande tumaro ilo?

₂₃So si mai vušořo: te phenav «tjire bezexa si jertime» vai «ušti ai phir»? ₂₄Eta, tume te žianen ke o Šiav le manušesko si les pe e phuv e putiaria te jertil le bezexa.

Me dav tu poronka, phenel vo le paralitikoske, ušti, le tjiro pato, ai žiatar ande tjiro kher.

₂₅Ai strazo, vo uštilo angla lende, lias o pato pe savo vo sovelas, ai gelo ande pesko kher, vestilas le Devles. ₂₆Sa sas lenge šodo, ai vestinas le Devles; pherde daratar, von phenenas:

Ame dikhliam adies dieli šodo.

₂₇Pala kudia, o Jesus anklisto avri, ai dikhlias jekhes kai kjidel e taksa le amperatoske, bušol Levi, bešel ande o kher kai pokjinen e taksa. Vo phenel leske:

Aidi pala mande.

₂₈Ai, muklias sa, vo uštilo, ai gelo pala leste.

₂₉O Levi dias les jekh bari pativ ande pesko kher, ai but kai kjiden e taksa ai kaver manuš sas pala e skafidi lensa. ₃₀Le Farizianuri ai lenge zakonaria bulguinas ande pende, phenenas leske vortakonge:

Sostar xan tume ai pen kudalensa kai kjiden e taksa ai le ženensa kai si lengo traio nasul?

₃₁O Jesus, lias e vorba, phenel lenge:

Nai kudalen kai si saste ke trubul len o doxtoro, numa le nasvalen. ₃₂Me či avilem t'akharav te kein pe kudalen kai si vorta, numa le bezexalen.

₃₃Von phenen leske:

Le vortača katar o Jono, sar kudala katar le Farizianuri, butivar postin ai řudjin pe, žikin tjire xan ai pen.

₃₄Vo del le palpale:

Šai keren tume te postin le vortača le terneske ande o abiav žikin vo si lensa. ₃₅Le dies avena kai o terno avela lino lendar, atunči postina kudala dies.

₃₆Vo mai phenel lenge jekh paramiči:

Khonik či šinel anda jekh tsolo nevo jekh kotor te thol les ka jekh tsolo purano; aver fialo, vo šinel o tsolo nevo, ai o kotor kai vo lias či avela jekh fialo sar o purano. ₃₇Ai khonik či thol mol nevi ande le bočonkuri purane; aver fialo, e mol nevi phařavel le bočonkuri, del muial, ai le bočonkuri si xasarde. ₃₈Numa trubul te thon e mol nevi ande le bočonkuri neve. ₃₉Ai khonik, kana pela mol purani, či kamel nevi, ke vo phenel: E purani si laši.