Lukas 4

₁O Jesus, pherdo Svinto Duxo, avilo anda o Jordan, ai sas ninkerdo katar o Duxo ande e pusta, ₂kai vo sas zumado katar o beng štar-var-deš dies. Vo či xalias khanči kudala dies, ai, kana von nakhle, vo sas bokhalo. ₃O beng phenel leske:

Te san tu o Šiav le Devlesko, de ordina ka kako bař t'avel manřo.

₄O Jesus del les palpale:

Si ramome: O manuš či traila ferdi anda o manřo.

₅O beng vazdias les, sikadias leske anda jekh data sa le amperatsi la phuviake, ₆ai phenel leske:

Me dava tu sa kadia zor, ai o vestimos kadale amperetsiango; ke von sas mange dine, ai me dav len kaske me kamav. ₇T'avela ke tu des čanga angla mande, von avena tjire.

₈O Jesus del les palpale:

Si ramome: Avela tuke drago o Baro, tjiro Del, ai tu služisa ferdi les.

₉O beng mai ningerdias les ande o Jerusalem, thodias les opre pe o templo, ai phenel leske:

Te san tu o Šiav le Devlesko, xuti kathar tele; ke si ramome:

₁₀Vo dela ordina ka peske andželi pala tute, eta te len tutar sama; ₁₁ai: Von ningerena tut pe penge vast, daratar ke tjiro punřo malavel jekh bař.

₁₂O Jesus del les palpale:

Si phendo: Tu či zumavesa le Bares tjiro Del.

₁₃Pala ke zumadias les sako fialo, o beng durilo lestar žikin či arakhela vramia mai laši.

₁₄O Jesus, e zor le Duxoski pe leste, gelo palpale ande e Galilea, ai lesko vestimos gelo ande sa o them krugom. ₁₅Vo sikiarel ande le khangeria židovitsko, ai les vestinas les sa.

₁₆Vo gelo ande o Nazaret, kai vo barilo, ai, sar sas lesko zakono, vo dias andre ande e khangeri židovitsko o dies o sabato. Vo uštilo te gjinel, ₁₇ai dine leste e kliška katar o profeto o Esai. Puterdias la, vo arakhlias o than kai si ramome:

₂₀Atunči, phanglias e kliška, dias la ka e sluga, ai bešel tele. Sa kudala kai sas ande e khangeri židovitsko sas lenge jakha thodine pe leste. ₂₁Atunči vo lias pe te phenel lenge:

Adies kadia vorba ramome, kai tume ašundian, kerdili.

₂₂Ai sa sas leske martururi; lenge sas šodo katar le vorbi drago kai anklenas anda lesko mui, ai von phenenas: Nai vo o šiav katar o Josef?

₂₃O Jesus phenel lenge:

Amburim tume phenen pe mande kadia paramiči: Doxtoro, sastiar tu korkořo; ai tume phenena mange: Ker kathe, ande tjiri phuv, sogodi ame ašundiam ke keres ande o Kapernaum.

₂₄Numa, mai phenel vo, me phenav tumenge čačimasa, či jekh profeto nai mišto lino ande peski phuv. ₂₅Me phenav tumenge čačimasa: sas but phivlia ande o Israel ande e vramia kai sas o Elia, kana o čeri sas phandado trin berš ai šov šion ai ke sas jekh bari bokh pe sa e phuv; ₂₆ai eta o Elia nas tradino karing či jekh anda lende, numa karing jekh žiuvli phivli, ande o Sarepta, ande o them o Sidon. ₂₇Vi mai sas but nasvale žiungale ande o Israel ande e vramia katar o Elise, o profeto; ai či jekh anda lende nas vužardo, numa o Naman o Siriano.

₂₈Len lias le sa e xoli ande e khangeri židovitsko, kana von ašunde kudala dieli. ₂₉Ai von uštile, von dine les avri anda o foro, ai ningerde les ži opre pe o plai pe savo o foro sas vazdino, eta te šiuden les tele. ₃₀Numa o Jesus nakhlo maškar lende, gelotar.

₃₁Vo vulisto ande o Kapernaum, foro anda e Galilea; ai vo sikiarel o dies o sabato. ₃₂Malavela len sar vo sikiarel: Ke vo delas duma putiariasa. ₃₃Arakhadilias ande e khangeri židovitsko jekh manuš kai sas les jekh demono bi-vužio, ai kai tsipil jekhe hangosa zurale:

₃₄A! so si maškar amende ai tute, Jesus anda o Nazaret? Tu avilian te xasares amen. Me žianav kon san tu: O svinto le Devlesko.

₃₅O Jesus daravel les, phenelas:

Aš, ai ankli avri anda kado manuš.

Ai o demono šiudias les maškar lende, ai anklisto avri anda leste, bi te kerel leske či jekh nasulimos. ₃₆Sa sas lenge šodo, ai phenenas jekh avreske:

Vo porončil barimasa ai zorasa ka le duxuri bi-vuže, ai von ankliste avri!

₃₇Ai lesko vestimos gelo ande sa le thana krugom.

₃₈Kana anklisto avri anda e khangeri židovitsko, vo gelo ka o kher le Simonosko. E sakra la Simonoski sas la jekh pria baro tatimos, ai von mangle les mištimasa te ažutil la. ₃₉Vo bangilo pe late, vo daravel o tatimos, ai o tatimos muklias la. Strazo voi uštili, ai služisardias len.

₄₀Pala ke pelo tele o kham, sa kudala kai sas len nasvale andine le leske. Vo thol o vast pe sako anda lende, ai sastiardias le. ₄₁Demonuri mai ankliste anda but žene, tsipinas ai phenenas: Tu san o Šiav le Devlesko. Numa vo daravelas len ai či mukelas len te den duma, ke von žianenas ke vo si o Kristo.

₄₂Sar o dies areslo, vo anklisto avri ai gelo ande jekh than pusto. O narodo thodias pe te roden les, ai aresle ži leste; von kamenas te ninkeren les, eta te na mukel len. ₄₃Numa vo phenel lenge:

Mai trubul te phenav e viasta ka le kaver foruri, e laši viasta pa e amperetsia le Devleski ke pala kudia me sim tradino.

₄₄Ai vo delas duma ande le khangeria židovitsko ande e Judea.