Lukas 2

₁Ande kudia vramia anklisto avri jekh zakono katar o Amperato Agusto, dias ordina te gjinen sa o narodo pe e phuv. ₂Kudo mai angluno gjinimos sas kana o Kerinius sas vladoro ande e Siria. ₃Sa žianas te ramon pe, sako ande pesko foro. ₄O Josef vo anklelas anda e Galilea, anda o foro o Nazaret, te žian ande e Judea, ande o foro katar o David, akharen les Betlehem, ke vo sas ande o kher ai anda e familia katar o David, ₅eta te ramol pe la Mariasa, leski tomnime, kai sas phari. ₆Kana von sas kothe, e vramia kai e Maria trubul te avel la glata aresli, ₇ai la si la lako mai angluno arakhado. Voi dias pe leste, ai thodias les te sovel kai xan le guruva, ke nas than lenge ande o kher kai sovelas o narodo.

₈Mai sas, sa ande kudia rig, pastuřuri kai nakhenas e riat ande le kimpuri te arakhen riate penge žigenien. ₉Ai eta, jekh andželo le Baresko sikadilo lenge, ai o vestimos le Baresko strefialas krugom lendar. Len lias len jekh pria bari dar. ₁₀Numa o andželo phenel lenge:

Na daran; ke me phenav tumenge jekh laši viasta, kai avela sa le narodoske jekh diela pria veselo. ₁₁Si adies, ande o foro katar o David, ke arakhadilo tumenge jekh skipitori, kai si o Kristo, o Rai. ₁₂Ai eta pe če semno tume prinžiarena les. Tume arakhena jekha glata uriadi ande o poxtan ai sovel ande jekh than kai xan le guruva.

₁₃Ai sigo avilo le andželosa jekh armia čeresko, luvudin le Devles ai phenen:

₁₅Kana le andželi geletar te žiantar palpale ande o čeri, le pastuřuri phenel jekh kavreske: Aven ži ande o Betlehem, te dikhas so areslias, so o Baro kerdias te žianas.

₁₆Von gele sigo, ai von arakhle le Josef ai la Maria, ai la tsinořa glata kai sovel ande o than kai xan le guruva. ₁₇Pala ke von dikhle les, von phenen so sas lenge phendo pe e tsinoři glata. ₁₈Sa kudala kai ašunenas lende sas lenge šodo so phenenas lenge le pastuřuri. ₁₉E Maria garavel sa kudala dieli, ai nakhavelas le ande pesko ilo. ₂₀Ai le pastuřuri gele palpale, vestin ai luvudin le Devles pe sa so von ašunde ai dikhle, ai ke sas jekh fialo sar sas lenge phendo.

₂₁O oxtoto dies, kana e glata trubulas t'avel šindo, areslo; dine les o anav o Jesus, anav kai phendiasas o andželo angla savořende t'avel ande o peř peska dako.

₂₂Ai, kana le dies te vužiol getosaile, sar si o zakono katar o Moše, o Josef ai e Maria ningerde les ande o Jerusalem, te sikaven les ka o Baro. ₂₃Sar si ramome ande o zakono katar o Baro: Sako murš o mai angluno arakhado avela thodino rigate le Bareske, ₂₄ai te den sakrifiso dui čirikliořa vai dui terne gulumburi, sar si ramome ande o zakono le Baresko.

₂₅Ai eta, sas ande o Jerusalem jekh manuš, akharenas les o Simeon. Kudo manuš sas vorta ai patialas, vo ažiukerelas e mila pe o Israel, ai o Svinto Duxo sas pe leste. ₂₆Leske sas phendo katar o Svinto Duxo ke vo či merela angla savořende te na dikhela le Kristos le Baresko. ₂₇Vo avilo ka o templo, spidino katar o Duxo. Ai, sar le niamuri anen la tsinořa glata o Jesus te keren karing leste so dias ordina o zakono, ₂₈vo lias les ande peske vast, svintsisardias le Devles, ai phenel:

₃₃Lesko dad ai leski dei sas lenge šodo anda le dieli so phenen pa leste. ₃₄O Simeon svintsil len, ai phenel la Mariake, leski dei:

Eta, kadia glata si šinado t'anel te peren ai te ušten but anda o Israel, ai t'aresel jekh semno kai le manuš či mangena, ₃₅ai vi tuke jekh xanřo nakhavela pa tjiro duxo, eta ke le ginduri butenge ande le ile t'aven dine avri.

₃₆Mai sas kothe jekh profetiasa, e Anna, šei katar o Fanuel, anda e kumpania o Ašer. Voi sas bute beršengi. Voi traisardias efta berš peske řomesa dekin sas šei pativali. ₃₇Bešli phivli, ai phuri oxto-var-deš ai štare beršengi, voi či mukelas o templo, ai voi služilas le Devles riate ai diese ande o posto ai ande o řudjimos. ₃₈Avili, vi voi, ande kudo časo, voi luvudil le Devles, ai voi del duma pa o Jesus ka sa kudala kai ažiukeren te skipil pe o Jerusalem.

₃₉Kana von kerde sa so dias ordina o zakono katar o Baro, o Josef ai e Maria gele palpale ande e Galilea, ande o Nazaret, pengo foro. ₄₀Eta e glata zuriavol ai bariol. Vo sas pherdo godji, ai e dragostia le Devleski sas pe leste.

₄₁O dad ai e dei le Jesusoske žianas sako berš ande o Jerusalem, pe o prasniko la Patradiako. ₄₂Kana vo sas deš-u-do beršengo, von ningerde les pe o prasniko sar sas lengo zakono. ₄₃Porme, kana le dies nakhle, ai ke von žian palpale, e glata o Jesus bešlo ande o Jerusalem. Lesko dad ai leski dei či line sama. ₄₄Von gindisarde ke vo sas peske vortakonsa pe o drom, von gele jekh dies pe e vurma, ai roden les maškar penge niamuri ai vortača. ₄₅Numa, či arakhle les, von gele palpale ande o Jerusalem te roden les. ₄₆Pala trin dies, von arakhle les ande o templo, bešelas maškar le zakonaria, ašunelas lende ai pušelas len. ₄₇Sa kudala kai ašunenas leste sas lenge šodo sar si leski godji ai sar del palpale. ₄₈Kana leske niamuri dikhle les, lenge sas šodo, ai leski dei phenel leske:

muři glata, sostar kerdian tu kadia amensa? Eta, tjiro dad ai me, ame rodas tu nekežimasa.

₄₉Vo phenel lenge: Sostar roden ma tume? Či žianen tume ke trubuv te lav sama le dieli muře Dadeske?

₅₀Numa von či hatiarde so vo phenel lenge.

₅₁Porme vo vulisto lensa ande o Nazaret, ai vo ašunelas lende. Leski dei garavelas sa kudala dieli ande pesko ilo. ₅₂Ai o Jesus bariol ande e godji, pe o stato, pe o šukarimos, angla o Del ai angla le manuš.