Apostoli 26

₁O Agripa phenel ka o Paul: Slobodo tuke te des duma te čačios. Ai o Paul, vazdias o vast, čačiol kadia:

₂Me gindiv ma ke sim veselo, amperato Agripa, ke si ma adies te čačiuvav angla tute anda sa kudala dieli kai si pe mande thodine doš katar le Židovuri, ₃ke tu žianes pria mišto lenge zakonuri ai lenge čingara. Me mangav tu t'ašunes mande vramiasa.

₄Muřo traio, de katar le mai angluni vrami muře ternimaske, žianen les sa le Židovuri, ke vo nakhlias ande o Jerusalem, maškar muřo narodo. ₅Von žianen de dumult, te kamen von te phenen, ke me traisardem Fariziano, sar si e partida e mai zurali katar amaro patiamos. ₆Ai akana, me sim dino pe e kris ke me ažiukerav ke si t'avel so o Del phendias ka amare dada, ₇ai so ažiukeren amare deš-u-dui kumpani, kai služin le Devles sakda riate ai diese. Si anda kudia kai ažiukerav, o amperato, kai thon beda pe mande le Židovuri! ₈So! miazol tumenge ke nai čačes ke o Del živindil le mulen?

₉Me gindisailem ke trubuv te žiav zorasa pe o anav o Jesus anda o Nazaret. ₁₀Sa me kerdem ande o Jerusalem, me šiudem ande e temnitsa but anda le svintsi, lem kudia putiaria katar le bare raša, ai, kana mudarenas len, vi me simas le kavrensa. ₁₁Me butivar mardem le ande le khangeria židovitsko, ai keravas te či mai patian. Ande muře xolia pe lende, me mardem le inke ande le foruri streia.

₁₂Ande kudia sas ke me gelem ande o Damasko, dine ma ordina ai mukle ma le bare raša. ₁₃Karing o maškar le diesesko, o amperato, me dikhlem pe e vurma ke strefial krugom mandar ai muře vortakondar jekh vedaria avel anda o čeri, ai o strefiamos sas mai baro sar o kham. ₁₄Ame peliam sa pe e phuv, ai me ašundem jekh hango kai phenelas mange židovitsko: Saul, Saul, sostar kjinuis ma tu? Trudno avela tuke te des palpale le pusaimata. ₁₅Me dem palpale: Kon san tu, Baria? Ai o Baro phenel: Me sim o Jesus kai tu kjinuis. ₁₆Numa, ušti, ai beš pe tjire punře; ke me sikavav ma tuke te thav tu ministero ai marturo pe le dieli kai tu dikhlian ai pe kudala kai me sikavava ma tuke, ₁₇Me skipisarava tu katar kado narodo ai katar kadala kai či patian, kai me tradav tu karing lende, ₁₈eta tu te putres lenge jakha, te šai nakhen anda o tuniariko ka e vedaria ai katar e zor le Satanoski ka o Del, ke von te len, ke patian pe ande mande, o jertimos katar le bezexa ai t'avel lenge o svintsimos.

₁₉Anda kudia, amperato Agripa, me naštisardem te na ninkerav ma ka kudo dikhimos le čeresko. ₂₀Ka kudala anda o Damasko angla savořende, porme ande o Jerusalem, ande sa e Judea, ka kudala kai či patian, me dem duma pa o keimos ai te pařuven pe ka o Del, te sikion le dieli kai keren te kein pe. ₂₁Eta anda soste le Židovuri line ma ande o templo, ai zumade te xasaren ma. ₂₂Numa, sar ažutisardias ma o Del, me ninkerdem ži adies, dav duma angla le bare ai le tsikne, bi te dav khanči rigate anda so le profeturi ai o Moše phende ke si t'aresel. ₂₃Ke o Kristo kjinuila, ai ke, živindila o mai angluno anda le mule, vo anela e vedaria ka le Židovuri ai ka le nai-židovuri.

₂₄Sar vo delas duma kadia te čačiol, o Festus phenel oprune hangosa: Tu san dilo, Paul! Tjiro sikiarimos diliarel tu.

₂₅Me či sim dilo, pria lašio Festus, mai del palpale o Paul; si, aver fialo, vorbi čačimaske ai laše godiake ke me phenav. ₂₆O amperato, phendem tuke kadala dieli, ai me dem tusa duma sar kamav, ke me sim siguro ke tu žianes sa, ke nai garades ke nakhle. ₂₇Patias-tu tu ka le profeturi, amperato Agripa?

₂₈Ai o Agripa phenel ka o Paul: Tu sigo si te manges ma t'avav kristiano!

₂₉O Paul del palpale: Ke t'avel akana vai t'avel mai palal, drago t'avel le Devleske ke na ferdi tu, numa mai sa kadala kai si krugom mandar adies, t'aresen sar me sim, bi kakale lansonsa!

₃₀O amperato, o vladoro, Berenise, ai sa kudala kai bešenas lensa, uštile, ₃₁ai, sar žiantar, phenenas jekh avreske: Kado manuš či kerdias khanči te mudaren les vai t'avel phandado. ₃₂Ai o Agripa phenel ka o Festus: Kado manuš šai daštilas te mukas les, te na manglias pe ka o Tsesar.