Apostoli 13

₁Sas ande e khangeri ande o Antioxi profeturi ai doxtori: o Barnabas, o Simon akharen les Kalo, o Lusius anda e Sirena, o Manaen kai barilo le vladorosa Herod ai o Saul. ₂Žikin von služinas le Bares ande pengi ministeria ai ke von postinas, o Svinto Duxo phenel: Thon mange rigate le Barnabas ai le Saul pe e butji savi me akhardem len.

₃Atunči, pala ke postisarde ai řudjisarde, von thode pe lende le vast, ai mukle len te žian-tar.

₄O Barnabas ai o Saul, tradine katar o Svinto Duxo, vuliste ande e Selevsia, ai kothar line o čuno te žian ande e inzula o Kipro. ₅Aresle ande e Salamina, von phenen e vorba le Devleski ande le khangeria le Židovonge. Sas lensa o Jono t'ažutil len.

₆Von atunči nakhle sa e inzula ži ande o Papos. Von arakhle jekhe drabarne, xoxamno profeto Židovo, bušol Bar-Jesus; ₇sas le bare konsulosa o Sergius Paulus, manuš godiaver. Kudo mai paluno akharel le Barnabas ai le Saul, ai mangel t'ašunel e vorba le Devleski. ₈Numa o drabarno, o Elimas, — kudia bušol lesko anav Grekitsko, — či mukelas len, rodelas te del rigate katar o patiamos le bare konsulos. ₉Atunči o Saul, akharen les vi Paul, pherdo Svinto Duxo, thodias o dikhimos pe leste, ai phenel: ₁₀Manuš pherdo sako fialo xitrenia ai athaimos, šiav le bengesko, dušmano sa la krisako, či avesa tu te rimos le vurmi vorta le Bareske? ₁₁Akana eta, o vast le Baresko si pe tute, tu avesa kořo, ai pe jekh vramia tu či dikhesa o kham.

Strazo o tamlo ai o tuniariko pele pe leste, ai vo rodel, le vastesa, ženen te ningeren les. ₁₂Atunči o vladoro dikhlias so areslias, patial pe, sas pria šodo sar sikiarenas pa o Baro.

₁₃O Paul ai peske vortača, gele pe o čuno anda o Papos, gele ande o Perge ande e Pamfilia. O Jono muklias le, ai gelo palpale ande o Jerusalem. ₁₄Ande o Perge von gele pengo drom, ai aresle ande o Antioxi ande e Pisidia. Dine andre ande e khangeri Židovitsko o sabato, von bešle tele. ₁₅Pala ke gjinde o zakono le profetengo, le birevia katar e khangeri židovitsko tradine te phenen lenge: Manuš phral, te si tumen vorbi te phenen te ažutin o narodo, den duma. ₁₆O Paul uštilo, ai kerdias semno le vastesa, vo phenel:

Manuš anda o Isrel, ai tume kai daran katar o Del, ašunen! ₁₇O Del katar kudo narodo anda o Israel alosardias amare daden. Vo thodias kado narodo opre žikin von sas te bešen ande o them e Egipta, ai vo ankaladias len avri pe pesko zuralo vast. ₁₈Vo pravardias len pašte štar-var-deš berš ande e pusta; ₁₉ai, von pelade efta thema ande o than o Kanan, von dias len e phuv t'avel lengi.

₂₀Pala kudia, pašte štar šela ai panž-var-deš berš, vo dias len krisinitoria, ži ka o profeto Samuel. ₂₁Von mangle atunči jekhe amperatos. Ai o Del dias les lenge, pašte štar-var-deš berš, le Saul, šiav katar o Kis, anda e kumpania o Beniamin; ₂₂porme, vo šiudias les, vo vazdias lenge le amperatos o David, kaske vo dias kadia marturia:

₂₃Si katar e vitsa le Davidoski, sar vo phendias, ke o Del vazdias ande o Israel jekh skipitori, kai si o Jesus. ₂₄Angla savořende vo t'avel, o Jono phendias o bolimos le keimasko ka sa o narodo ande o Israel. ₂₅Ai kana o Jono getosardias so sas te phenel, vo phenelas: Me či sim kudo kai tume gindin; numa eta, pala mande avel kudo kai me či sim harniko te putrav le doria leske papučenge.

₂₆Manušale phralale, šiave anda e vitsa le Abrahamoski, ai tume kai daran katar o Del, tumenge si ke kadia vorbi skipimaske si tradine. ₂₇Ke kudala kai bešen ande o Jerusalem ai lenge birevia či prinžiardias le Jesus, ai kai dine les strafo, von kerde so phenenas le vorbi katar le profeturi kai von gjinenas sako sabato. ₂₈Makar ke von či arakhle ande leste khanči anda soste trubul te mudaren les, von mangle katar o Pilato te mudaren les. ₂₉Ai, pala ke von kerde sa so sas ramome pa leste, von vuliarde les pa o trušul ai thodine les ande jekh groapoševo. ₃₀Numa o Del živindisardias les katar le mule. ₃₁Vo sikadilo but diesa ka kudala kai ankliste lesa anda e Galilea ande o Jerusalem, ai kai si akana leske martururi paša o narodo. ₃₂Ai ame, ame mothas tumenge kadia laši viasta kai sas phendi ka amare dada. ₃₃O Del kerdias la amenge, lenge šiave, ke živindisardias le Jesus, sar ri ramome ande e Psalmo e duito:

₃₄Kai vo živindisardias les katar le mule, anda kudia ke vo či mai žiala palpale te rimol pe, si so vo phendias, kana phenelas:

₃₅Sa anda kudia mai phenel pe kaver rig:

₃₆Eta o David, pala ke les sas leski vramia sar kamlias o Del, vo mulo, sas thodino peske dadensa ai vo dikhlias o rimomos. ₃₇Numa kudales kai o Del živindisardias či dikhlias o rimomos. ₃₈Te žianen tume, manušale phralale, ke lestar, o Jesus, si ke o jertimos le bezexango si tumenge phendo, ₃₉ai ke kon-godi patial ande leste avela jertime anda peske bezexa kai tume naština te keren katar o zakono le Mošesko. ₄₀Kadia, len tume sama te na aresel tumenge so si phendo ande le profeturi:

₄₂Kana von ankliste avri, řudjisarde len te mai den duma lenge o sabato kai avela pe kudala dieli; ₄₃ai pala ke kjidenas pe, but anda le Židovuri ai anda le proselituri gele palal o Paul ai o Barnabas, kai denas duma lensa ai vazdenas len te bešen phangle ka e dragostia le Devleski.

₄₄O sabato pala kudo, pašte sa o foro kjidinisailo t'ašunen e vorba le Devleski. ₄₅Le Židovuri, dikhen o narodo, lias le e xoli, ai von dine palpale so phenelas o Paul, ai prasanas les. ₄₆O Paul ai o Barnabas phenenas lenge zorasa: Tumenge angla savořende ke trubulas ke e vorba le Devleski sas t'avel phendi numa, sar tume den la palpale, ai ke tume inke den tume kris ke či san harniči t'avel tumen o traio pe sakda, eta, ame amboldas ame karing le nai-Židovuri. ₄₇Ke kadia dias amen ordina o Baro:

Te ningeren o skipimos ži ande o koltso la phuviako.

₄₈Le nai-Židovuri veselisaile kana ašunde kudia, von luvudin e vorba le Bareski, ai sa kudala kai sas šinade ka sa o traio patian.

₄₉E vorba le Devleski geli ande sa o them. ₅₀Numa le Židovuri vazde le žiuvlian le mai baria kai patian ai le mai baren ande o foro; von kerde t'avel jekh kjinuimos pe o Paul ai pe o Barnabas, von dine le avri pa pengi phuv. ₅₁O Paul ai o Barnabas khosle e kišai pa penge punře pe lende, ai gele ande o Ikonium, ₅₂žikin le vortača sas pherde veselia ai Svinto Duxo.