3 Jono 1

₁Katar o Phuro,

ka o Gaius, o mai drago, kai si mange drago ande o čačimos.

₂Muřo drago, me mangav ke tu te barios ande sako diela ai t'aves sasto vesto, sar butiol tjiro duxo. ₃Me simas but veselime, kana le phral aresle ai dine marturia pa o čačimos kai si ande tute, ai sar tu phires ande o čačimos. ₄Nai ma mai bari veselia ke sar t'ašunav ke muře glati phiren ande o čačimos.

₅Muřo drago, tu keres sar trubul ande so tu keres le phralenge, ai inke le phralenge streia, ₆save si martururi anda tjiro mištimos, angla e Khangeri. Tu keres mišto te des len so trubul pe o drom sar kamel o Del. ₇Ke si pala o anav le Jesus Kristosko ke von geletar, bi te len khanči katar kudala kai či patian. ₈Ame trubusaras te las sama katar kasave manuš, eta t'avas butiaria lensa pe o čačimos.

₉Me ramosardem uni vorbi ka e khangeri; numa o Diotref, kai si leske drago t'avel o mai angluno maškar lende, či primil amen. ₁₀Sa anda kudia, te si te žiav te dikhav tumen, me phenava tumenge so vo kerdias, sar phenel pe amende nasul divanuri; na ke ferdi mišto leske kadia, vo či primil le phralen, ai kudala kai kamen te primin len, vo či mukel len ai gonil le anda e khangeri.

₁₁Muřo drago, na ker sar o nasulimos, numa ker sar o mištimos. Kudo kai kerel o mištimos si katar o Del; kudo kai či kerel o mištimos nai katar o Del.

₁₂Savoře, ai vi o čačimos inke, den jekh laši marturia ka o Demetrius; vi ame das les marturia ai tu žianes ke amari marturia si čači.

₁₃Si ma but dieli te ramov, numa či kamav te kerav kudia la černilasa ai le poresa, ₁₄Gindiv ma ke sigo si te dikhav tu, ai ame dasa duma mui moste!

₁₅Unpači.

Le vortača den tu pozdraimos. De pozdraimos le vortačen, jekh pa jekh.