2 Timoteo 4

₁Me řudjiv tu angla o Del ai angla o Jesus Kristo, kai trubul te del pe e kris le živinden ai le mulen, ai angla o anav ke vo sikadiola ai anda leski amperetsia, ₂phen e vorba, žia angle zuralimasa, te šai daštis vai niči, mai phen, phen vi kodo lenge kai či keren vorta, vazde le manušen, sa le kovlimasa ai le sikiarimasa. ₃Ke avela jekh vramia kana le manuš či řibdina svinto sikiarimos; numa, xal le e mortsi kana ašunen le dieli drago, von kjidena but doxtori sar von kamen. ₄Dena rigate o kan katar o čačimos, ai von amboldena pe karing le kovle. ₅Numa tu, te na aves mato ande či jekh diela, ninker le dukha, ker e butji sar jekh kai ningerel e Laši Viasta.

₆Ke mange, me inke služiv sar trubul, ai e vramia kai si te žiavtar pašiol. ₇Me mardem o lašio marimos, me getosardem muřo drom, me garadem o patiamos. ₈De akanara e kurona la krisaki si mange thodini rigate; o Baro, o vorta krisinitori, vo dela la mange ande kadala diesa, ai na ferdi mange, numa vi sa kudalenge kai si lenge drago ke avel.

₉Aidi sar mai sigo karing mande; ₁₀Ke o Demas muklias ma, ke kamel kudia lumia, ai vo gelotar te žial ande e Tesaloniki; o Kreskes gelo ande e Galatia, o Titus ande e Dalmatsia. ₁₁Ferdi o Lukas si mansa. Le le Marko, ai an les tusa, ke vo trubul ma pala muři ministeria. ₁₂Me tradem le Tixiko ande o Efeso. ₁₃Kana tu avesa, an e bunda kai me muklem ande o Troas ka o Karpus, ai le kniški, mai but le xarti.

₁₄O Alexandre, o kovači, kerdias mange but nasul. O Baro dela les sar si leske butia. ₁₅Le tu sama lestar, ke vo ninkerel pe zurales katar amare vorbi.

₁₆E mai angluno data kai kamlem te čačiuvav, khonik nas t'ažutil ma, numa sa mukle ma. Ke kudia te na avel pe lende doš! ₁₇O Baro ažutisardias ma ai zuriardias ma, eta ke o divano t'aresel mandar ai ke sa kudala kai či patian t'ašunen la. Ai me simas lino avri anda o mui le lionosko. ₁₈O Baro skipila ma anda sa le butia nasul, ai vo skipila ma te del ma andre ande e amperetsia le čereski. Leske t'avel o vestimos berš beršestar! Amen!

₁₉De pozdraimos la Priska ai le Akilas, ai e familia katar o Onesifora. ₂₀O Erasto ašilo ande o Korinto, ai me muklem le Trofimo nasvalo ande o Mileto. ₂₁Zumav t'aves angla savořende o iven. O Eubulus, o Pudens, o Linus, e Klodia, ai sa le phral den tu pozdraimos.

₂₂Ke o Baro t'avel tusa! Ke o mištimos t'avel tumensa.