2 Timoteo 3

₁Te žianen ke ande le mai paluno dies, avela vramia trudno. ₂Ke le manuš avena barimatange, vortača le lovenge, luvudina pe, dena opral, prasana, buntuina-pe pe penge niamuri, či naisina, či patiana, ₃zurale, nai čače, ningerena divano, či řibdina, bengeske, dušmaia le ženenge kai si laše, ₄Nai laše, bariarena pe, phukiona ande le barimata, drago lenge avela o traio mai but sar o Del, ₅sikavena pe avrial sar ke si len amaro patiamos numa dena palpale leski zor. Žia dur katar kudala manuš. ₆Si maškar lende kai aven ande o kher, ai kai diliaren le žiuvlian kai si le jekh duxo kovlo ai kořo, pherde bezexa, miškin pala sako diela, ₇sakda sikion ai šoha naštin t'aresen te žianen o čačimos. ₈Sa jekh fialo sar ke o Janes ai o Jambres thode-pe pe o Moše, sa jekh fialo kudala manuš či žianen o čačimos, lengi godji si rimome, dine palpale anda so si o patiamos. ₉Numa von či žiana mai angle; ke lengo dilimos dikhena les sa, sar dikhenas o dilimos katar o Janes ai o Jambres.

₁₀Numa tu, tu gelian pala so sikiardem tu, muři vurma, muře ginduri, muřo patiamos, muřo kovlimos, muřo dragomos, muřo ninkerdimos, ₁₁muře kjinuimata, muře dukha: Ka če dukh me či simas thodino ande o Antioxi, ande o Ikonium, ande o Listre? Če marimos me či ninkerdem? Ai o Baro skipisardias ma anda sa. ₁₂Eta, sa kudala kai kamen te train čačimasa ande o Jesus Kristo avena marde. ₁₃Numa le manuš nasul ai xoxamne žiana mai but ande o nasulimos, den pe rigate ai den rigate le kavren. ₁₄Tu, beš ande le dieli kai sikilian ai kai si tuke drago; žianes katar tu sikilian; ₁₅de tsinořara, tu žianes le svintsi lila, kai šai daštin te godiaveren tu te skipis tu katar o patiamos ande o Jesus Kristo. ₁₆Sa o Ramomos avel katar o Del, ai si lašio te sikiarel, o čačimos te sikavel te lašiaren, te sikiarel te train ande e kris, ₁₇eta ke le manuš le Devleske t'aven laše ai vuže pe sako laši butji.