1 Korintianuri 12

₁Pe so si le dinimata duxoske, me kamav, phralale, ke tume te žianen.

₂Tume žianen ke, kana tume san te na patian, tume žian karing le staturi mutsi, sar tume sanas ningerde. ₃Sa anda kudia me phenav tumenge ke khonik, te dela duma katar o Duxo le Devlesko, či phenel: O Jesus si armandino! ai khonik naštil te phenel: O Jesus si o Baro! te na avela katar o Svinto-Duxo.

₄Si but fialuri so del o Del, numa feri jekh Duxo; ₅but službiri, numa feri jekh Baro; ₆But so šai keren, numa sa o jekh Del kai kerel sa ande sa. ₇Eta, sakoneske si les dino o Duxo t'avel lašio savořenge. ₈Čačes, ka jekh si dini katar o Duxo e putiaria te del duma katar e godji; ka o kaver, te del duma katar o žianglimos sa anda kodo Duxo; ₉ka jekh kaver, o patiamos, sa katar kodo Duxo, ka o kaver den les e putiaria te sastiarel, sa katar jekh Duxo; ₁₀ka jekh kaver, si les e putiaria te kerel čudeni; ka jekh kaver, te del duma ande o anav le Devlesko ka jekh kaver, te lel sama save si le duxuri; ka jekh kaver, te del duma pe le šiba; ka jekh kaver, te tolmačil kudia šib. ₁₁Jekh ferdi ai jekh fialo Duxo kerel sa kudala dieli, den le ka sakoneste sar vo kamel.

₁₂Ke, sar o stato si jekh ai si les but kotora, ai sar sa le kotora le statoske, makar ke si von but, si ferdi jekh stato, kadia si ande o Kristo. ₁₃Amen si amen sa, čačes, bolde ande jekh Duxo, t'avel amen jekh stato, te sam Židovuri, te sam Grekuri, te sam řoburi, te sam skipime, ai ame sa sam pravarde katar ferdi jekh Duxo.

₁₄Kadia o stato nai vo ferdi jekh kotor, numa si kerdo anda but kotora. ₁₅Te phenela o punřo: Sar ke me či sim jekh vast, me či sim anda o stato — či avela vo anda o stato anda kudia. ₁₆Ai te o kan phenela: Sar ke me či sim jekh jakh, me či sim anda o stato — či avela vo anda o stato anda kudia. ₁₇Te sa o stato te avilinosas jakh, sar sas t'ašunel? Te avilinosas sa kan, sar sas te šiungel? ₁₈Akana o Del thodias sako kotor ande o stato sar vo kamlias. ₁₉Te sas te avilinosas ferdi jekh kotor, kai sas t'avel o stato? ₂₀Akana si but kotora, ai ferdi jekh stato.

₂₁E jakh naštil te phenel le vasteske: Tu či trubus ma; či o šero te phenel le punřenge: Tumen či trubun ma. ₂₂Numa mai mišto, le kotora le statoske kai miazon ke si le mai kovle trubun; ₂₃ai kudala kai ame gindisaras ke si mai tsiřa te trubun le statos, ame las lendar sama mai mišto. Kadia amare kotora le mai tsiřa pativale si len mai bari pativ, ₂₄žikin kudala kai si pativale či trubul len. O Del lašiardias o stato kadia te del pativ kudalen kai nai le, ₂₅eta te na hulavel pe o stato, numa ke le kotora te len sama jekh katar le kaver. ₂₆Ai te si ke jekh kotor kjinuil, sa le kotora kjinuin lesa; te si jekh kotor ke den les pativ, sa le kotora veselin pe lesa.

₂₇Tume san o stato le Kristosko, ai tume san leske kotora, sako pe peski partia. ₂₈Ai o Del thodias ande e Khangeri angla savořende le apostolon, pe e duito le profeton, pe e trito le doxtoron, atunči kudalen kai si le dino te keren čudeni, porme kudalen kai si len dino te sastiaren, te ažutisaren, te porončin, te den duma but šiba. ₂₉Sa si von apostoli? Sa si von profeturi? Sa si von doxtori? Sa si len o dinimos te keren čudeni? ₃₀Sa si len o dinimos te sastiaren? Sa den von duma pe le šiba? Sa von tolmačin?

₃₁Mangen le dinimata le mai laše. Ai me mai kamav te sikavav tumenge jekh mai laši vurma.