Lucca 6

₁Un ghjornu di sabbatu ch'elli arruchjavanu lochi suminati, i discepuli cuglianu e spighe, sgranillavanu è manghjavanu. ₂Certi Farusei dissenu: «cumu hè chì voi fate ciò chì ùn hè parmessu in sabbatu?» ₃Ghjesù li rispose è disse: «soga ùn avete lettu ciò ch'ellu fece Davide, quand'elli ebbenu a fame, trà ellu è i cumpagni? ₄Cum'ellu intrì in la casa di Diu, pigliede i pani di l'offerta, manghjede issi pani chì solu i preti anu u dirittu di manghjalli, è ne dede à quelli chì eranu cun ellu?» ₅È li disse: «u Figliolu di l'Omu hè u Maestru di u sabbatu.»

₆Un antru ghjornu di sabbatu, capitò chì Ghjesù intrì in la sinagoga, è insignava è ci era un omu chì a so manu diritta era secca. ₇I scribi è i Farusei guaitavanu à Ghjesù, par vede s'ellu avia da fà guarizione in sabbatu è par truvà una scusa da incausallu. ₈Ma ellu cunniscia i so raghjunamenti, è disse à l'omu chì avia a manu secca: «arrizzati è veni quì à mezu à tutti!» Quellu s'arrizzò è stede arrittu, ₉è Ghjesù disse à tutti: «vi dumandu s'ellu hè parmessu, in sabbatu, di fà u bè o u male? Di salvà una vita o di perdela?» ₁₀Ghjesù i guardò tutti in giru à ellu, è disse à l'omu: «stendi a manu!» Cusì fece quellu, è a manu guarì. ₁₁Ma elli funu pieni di rabbia è trà elli, discurrianu di ciò ch'ellu si pudaria fà à Ghjesù.

₁₂In quelli tempi, Ghjesù andede in la muntagna à pricà, è passede a nuttata prichendu à Diu. ₁₃Quand'ellu fece u ghjornu, chjamede i so discepuli, ne scelse dodici è li dede u nome d'apostuli: ₁₄Simone, ch'ellu chjamede Petru, Andria u fratellu, Ghjacumu, Ghjuvanni, Filippu, Bartulumeu, ₁₅Matteu, Tumasgiu, Ghjacumu figliolu d'Alfeu, Simone cugnumatu u Patriottu, ₁₆Ghjuda figliolu di Ghjacumu, è Ghjuda Iscariotu chì fù ellu u traditore.

₁₇Falatu cun elli, fece l'arretta ind'una pughjola è ci era a folla maiò di i so discepuli cù ghjente assai, vinuta da tutta a Ghjudea, da Ghjerusaleme, da a marina di Tiru è di Sidone. Eranu vinuti à sentelu è à fà si guarì di i so malanni, ₁₈è quelli chì eranu tarnalati da i spiriti impuri eranu guariti ₁₉è a folla accolta pruvava à tuccallu chì da ellu iscia una forza chì guaria à tutti.

₂₀Tandu ellu pisede l'ochji voltu i so discepuli è disse:

₂₂Biatu à voi quandì l'omi vi udiaranu è ch'elli vi lamparanu fora, è ch'elli vi insultaranu, è ch'elli riittaranu u vostru nome da scillaratu par via di u Figliolu di l'Omu. ₂₃Ralicratevi, tandu, è saltate di gioia, chì, in celu, avarete a paca maiò; i babbi di quessi fecenu listessa cù i prufeti.

₂₆Guai quandì tutti l'omi vi mintuvaranu in bona: cusì facianu i babbi di quessi cù i falzi prufeti.»

₂₇«Ma a vi dicu, à voi chì mi sintite: tinite cari i vostri numichi, fate u bè à quelli chì vi odianu, ₂₈binadite quelli chì vi maladiscenu, pricate par quelli chì vi facenu u male. ₂₉À quellu chì ti mena in faccia da un latu, prisenta li dinò quill'altru latu è à quellu chì ti leva u mantellu, lascia ch'ellu si pigli ancu a camisgia. ₃₀Dà à ognunu chì ti chede, è à quellu chì ti leva u toiu, ùn dumandà ch'ellu u ti rendi. ₃₁È cum'ì voi bramate ch'elli fianu l'omi cun voi, fate cun elli listessa. ₃₂Sì voi tinite quelli chì vi tenenu, duva hè u meritu vostru? Ancu i piccatori tenenu à chì i tene. ₃₃È sì voi fate u bè à quelli chì vi facenu u bè, duva hè u meritu vostru? Cusì facenu ancu i piccatori. ₃₄È sì voi impristate à quelli chì voi cridite ch'elli vi anu da rende, duva hè u meritu vostru? Ancu i piccatori imprestanu à i piccatori da ch'elli li rendinu altru è tantu. ₃₅Ma tinite cari i vostri numichi, fate u bè è impristate senza aspittà nulla. A vostra paca sarà maiò è sarete figlioli di l'Altissimu, chì ellu hè bravu cù i ingrati è cù i gattivi. ₃₆Siate pietosi cum'ellu hè pietosu u vostru babbu.»

₃₇«Ùn ghjudicate è ùn sarete ghjudicati, ùn cundannate è ùn sarete cundannati, pardunate è sarete pardunati, ₃₈date è vi sarà datu: vi sarà lampatu in zenu una misura bona, zeppa, strinta, è chì sbarsa, chì sarete misurati cù a misura chì voi aduprate par misurà à l'altri.» ₃₉È li disse dinò una parabula: «soca un cecu pò guidà un cecu? Ùn si lamparanu po tramindui ind'un tracone? ₄₀U scularu ùn hè sopra à u Maestru, ma s'ellu hè amparatu cumu si deve, ogni scularu sarà quant'è u so Maestru. ₄₁Cumu hè chì tù faci casu à u stiglione indì l'ochju di to fratellu è in lu toiu, l'ochju, ùn ci vedi u burdunale? ₄₂È cumu poi dì à to fratellu: “o fratè, lascia ch'e' cacci issu stiglione chì tù ai indì l'ochju”, tù chì ùn vedi u burdunale chì hè in lu toiu, l'ochju? Falzu chì tù sè, caccia prima u burdunale da u toiu, l'ochju, è tandu ci vidarè da caccià u stiglione da l'ochju di to fratellu.»

₄₃«Chì ùn ci hè arburu bonu chì fia frutti gattivi, nè arburu gattivu chì fia i frutti boni. ₄₄Chì ogni arburu si cunnosce à u fruttu soiu. Annantu à e spine, fichi ùn si ne coglie, è mancu si vindimieghja uva in li lamaghjoni. ₄₅L'omu bonu pruduce u bè da u tisoru bonu di u so core, è u cattivu da u so tisoru cattivu, pruduce u male, chì a bocca parla cù u sbarsu di u core.»

₄₆«Cumu hè chì voi mi chjamate: “o Signore, O Signore!” È ùn fate ciò ch'e' vi dicu? ₄₇Ogni omu chì vene à truvà mi, sente e me parolle è e mette in pratica, vi faraghju vede à qual'ellu s'assumiglia: ₄₈S'assumiglia à un omu chì face una casa, hà zappatu fondu è postu u fundamentu annantu à a petra. Hè falata a fiumara, u fiume hà suttrinnatu quella casa ma ùn hè statu bonu à spiantalla parchì era custrutta cumu si deve. ₄₉Ma quellu chì sente è ùn mette in pratica hè cum'è un omu chì hà custruttu a so casa annantu à u tarrenu, senza fundamentu. A fiumara hè vinuta è subitu a casa si ne hè falata ed hè stata una ruvina maiò.»