Ghjuvan Battista pridicheghja
1L'annu quindicesimu di u guvernu di Tiberiu Cesaru, Punziu Pilatu era guvernatore di a Ghjudea, Erode tetrarca di a Galilea, u fratellu Filippu tetrarca di l'Iturea è di u tarritoriu di a Traconita è Lusania tetrarca di u tarritoriu d'Abila, 2è i capisacerdoti eranu Anna è Caiffa: tandu a parolla di Diu fù mandata à Ghjuvanni, filiolu di Zaccaria, in lu disertu; 3Ghjuvanni andò in tuttu u circondu di u Ghjurdanu chjamendu à u battezzimu di pintimentu da ch'elli sianu pardunati i piccati, 4cum'ella hè scritta in lu libru di e parolle d'Isaia, u prufeta:
hè a voce d'un omu chì grida in lu disertu,
appruntate a strada di u Signore,
fate li l'andati diritti;
5Sarà ripiuta ogni bassa,
sarà spianata ogni muntagna è ogni pughjola,
I passaghji storti vinaranu diritti,
è e strade sfussate saranu apparinate;
6è ogni carne vidarà a salvazione di Diu.
7È dicia à e manse di a ghjente chì vinianu da ch'ellu e battezzi: «o razzinu di vipare, quale vi hà ammunitu di fughje a collara chì hà da vene? 8Fate frutti chì sianu quelli di u pintimentu, è ùn cuminciate à dì in voi stessi: “cum'è babbu avemu à Abraamu.” Chì a vi dicu, ancu da isse petre, Diu pò fà nasce figlioli pà Abraamu! 9Chì, à dighjà, a piola hè messa à a radica di l'alberi: l'arburu chì ùn face u fruttu bellu và mozzu è lampatu in lu focu.» 10È e folle u intarrugavanu, dicendu: «è chì ci tocca à fà?» 11Li rispose è disse: «à chì hà duie camisge, ch'ellu ne dia una à quellu chì ùn ne hà, è à chì hà da manghjà ch'ellu fia listessa.» 12Affacconu ancu i paccittori chì vulianu esse battezzi, è li dissenu: «o Maestru, chì ci tocca à fà?» 13Li disse: «ùn pigliate nulla in soprappiù di ciò chì v'hè statu fissatu.» 14Ci funu ancu i suldati chì li dumandonu: «è à noi, chì ci tocca à fà?» Li disse: «ùn maltrattate à nimu è ùn accusate à nimu di ciò ch'ellu ùn hà fattu, ma cuntintate vi di a vostra paca.»
15Cum'è u populu era in aspittera è chì ognunu si dumandava, da sè à sè, sì Ghjuvanni ùn era micca u Cristu, 16à tutti li rispose, è disse: «eiu vi battezzu cù l'acqua, ma vene quellu chì hè più altu cà mè, è chì eiu ùn sò mancu da scioglieli a currighjina di i scarpi, ellu vi battizzarà cù u Spiritu santu è u focu; 17avarà u spulellu in manu è pulisciarà u so granu è ammansarà u granu in granaghju, ma a paglia a brusgiarà ind'un focu chì mai si spenghje.» 18Chjamendu cusì è in parechje altre manere, Ghjuvanni purtava a nutizia bona à u populu. 19Ma Erode, u tetrarca, chì Ghjuvanni l'avia datu da dì par via d'Erudiada a moglia di u fratellu, è par via di tutte e so altre malfatte, 20ne fece una antra: ficcò à Ghjuvanni in prighjò.
Battezimu di Ghjesù
21Mentre chì tutti si facianu battizzà, fù battezzu ancu Ghjesù è, in lu mentre ch'ellu pricava, u celu s'aprì 22è u Spiritu Santu li si calò addossu cù a forma curpurale d'una culomba, è vense una voce da u celu: «tù sè u me figliolu, u me caleghju, è in tè mi ralecru.»
L'antichi di Ghjesù
23Quand'ellu principiò, Ghjesù avarà avutu in li trenta anni, issendu, cum' omu cridia, figliolu di Ghjaseppiu, figliolu d'Alia, 24figliolu di Mattat, figliolu di Levì, figliolu di Melchi, figliolu di Iannai, figliolu di Ghjaseppiu, 25figliolu di Mattattia, figliolu d'Amosu, figliolu di Naumu, figliolu d'Esli, figliolu di Naggai, 26figliolu di Maat, figliolu di Mattattia, figliolu di Semein, figliolu di Iosè, figliolu di Ioda, 27figliolu di Ioanan, figliolu di Resa, figliolu di Zorobabel, figliolu di Salatiel, figliolu di Neri, 28figliolu di Melchi, figliolu d'Addi, figliolu di Kosam, figliolu d'Elmadam, figliolu d'Er, 29figliolu di Ghjesù, figliolu d'Elieser, figliolu di Iorim, figliolu di Mattat, figliolu di Levì, 30figliolu di Simeone, figliolu di Ghjuda, figliolu di Ghjaseppiu, figliolu di Ionam, figliolu d'Eliachimu, 31figliolu di Melea, figliolu di Menna, figliolu di Mattata, figliolu di Nattanu, figliolu di Davide, 32figliolu di Iessai, figliolu di Iobed, figliolu di Booz, figliolu di Salà, figliolu di Naassone, 33figliolu d'Aminadab, figliolu d'Admin, figliolu d'Arni, figliolu di Esrom, figliolu di Fares, figliolu di Ghjuda, 34figliolu di Ghjacobbe, figlionu d'Isaccu, figliolu d'Abraamu, figliolu di Tara, figliolu di Nachor, 35figliolu di Seruch, figliolu di Ragau, figliolu di Falec, figliolu di Eber, figliolu di Salà, 36figliolu di Cainamu, figliolu d'Arfacsad, figliolu di Sem, figliolu di Noè, figliolu di Lamec, 37figliolu di Matusalemu, figliolu d'Enoccu, figliolu di Iaret, figliolu di Maleleel, figliolu di Chenam, 38figliolu d'Elnos, figliolu di Set, figliolu d'Adamu, figliolu di Diu.
