Lucca 19

₁Pigliendu ad arrochju, Ghjesù era intrutu in Ghjericcò, ₂ed eccuti chì un omu, chjamatu Zaccheu, capì'publicanu chì era riccu, ₃si pruvava à vede qual'ellu era Ghjesù, ma par via di a ghjente accolta, ùn la li facia chì era chjucu. ₄Pigliò le corse in davanti è andò à cogliesi annantu à un caprificu par vedelu à u francà. ₅Ghjesù ghjuntu duv'ellu era, pisò l'ochji è li disse: «o Zacchè, barcati à l'allestra chì oghje sogna ch'e' stia in casa toia.» ₆Zaccheu si barcò à l'allestra è l'accolse cuntentu è alegru. ₇Videndu cusì, tutti murmuttulavanu è dicianu: «hè andatu à piglià alloghju indè un piccatore.» ₈Ma Zaccheu s'arrizzò è disse: «mì, o Maestru, dò à i povari a mità di tuttu u meiu, è s'e' mi so impatrunitu mai di quellu di nimu, li ne vogliu dà quattru volte altrettantu.» ₉Ghjesù li disse: «oghje, indì issa casa, ci hè intrutu u salvamentu, chì ancu iss'omu hè figliolu di Abraamu. ₁₀Chì u Figliolu di l'Omu hè vinutu à ricattà ciò chì era persu.»

₁₁Mentre ch'elli stavanu à sente, aghjunse una parabula parchì era vicinu da Ghjerusaleme è si cridia ch'ellu avissi da cumparisce subitu subitu, u Regnu di Diu. ₁₂Tandu disse: «un omu di l'alta si ne andò ind'un paese luntanu, da esse fattu rè è vultà dopu. ₁₃Chjamò dece servi di soiu, li dede dece libre d'argentu è disse: “fate le fruttà intantu chì eiu volti.” ₁₄Ma i so paisani li eranu numichi, dopu partutu ellu, mandonu una imbasciata par dì: “à quessu, da rè, ùn lu vulemu.” ₁₅Di vultata, dopu esse statu fattu rè, mandò à chjamà i so servi chì avianu avutu i soldi, par sapè u modu chì ognunu l'avia fatti fruttà. ₁₆U primu vense è disse: “o Signore, a to libra d'arghjentu nè hà vintu altre è dece.” ₁₇Li disse: “bravu, o servu bonu. Par via chì tù sè statu fidu in lu pocu, ti faciu guvernatore di dece cità.” ₁₈Vense u sicondu è disse: “o Maestru, a to libra d'arghjentu nè hà vintu altre è cinque.” ₁₉Li disse: “ancu tù, sia guvernatore di cinque cità.” ₂₀Ne vense un antru è disse: “o Maestru, eccu a to libra d'arghjentu, l'aghju incumpannata da tenela contu, ₂₁chì aviu a paura di tè, chì sè un omu duru, pigli quellu chì tù ùn arricasti è raccogli quellu chì tù ùn suminasti.” ₂₂Li disse: “ti ghjudicaraghju sicondu e to parolle, gattivu servu chì tù sè. A sapii ch'e' sò un omu duru, ch'e' pigliu quellu ch'è ùn arricoiu è raccogliu quellu ch'e' ùn suminoiu. ₂₃Ma chì ùn mittii i me soldi ind una banca, da ch'e' i ricuti cù u fruttu à u vultà?” ₂₄Poi disse à quelli chì li si tinianu à latu: “livateli a libra di l'arghjentu è date la à quellu chì hà e dece” ₂₅è li dissenu: “o Maestru, ne hà dece!” ₂₆A vi dicu, à quellu chì hà, li sarà datu in soprappiù, ma à quellu ch'ùn hà, ancu u so pocu è tantu li sarà toltu. ₂₇In quantu è à issi me numichi chì ùn mi volsenu da rè, arricate i mi quì è tumbate li.» ₂₈Parlatu ch'ellu ebbi cusì, Ghjesù partì in davanti, à via di Ghjerusaleme.

₂₉Quand'ellu fù vicinu da Betefagè è da Betania, voltu l'altura chjamata “di l'Alivi”, Ghjesù mandò dui discepuli, ₃₀dicendu: «Andate in lu paese chì hè quì di punta, intruti chì vo sarete, avete da truvà, ligatu, un poltru chì ùn hè ancu acconciu. Disciuglite lu è arricatelu quì. ₃₁Sì nimu vi dumanda: “Cumu hè chì voi u disciuglite?” li diciarete: “U Signore ne hà bisognu.”» ₃₂Quelli andedinu è truvedinu e cose tale è quale chì Ghjesù l'avia detta. ₃₃Mentre ch'elli disciuglianu u poltru, i patroni dissenu: «Cumu hè chì voi u disciuglite?» ₃₄Rispundinu: «U Signore ne hà bisognu.» ₃₅Arrichedinu u poltru, li messenu annantu à u spinu i panni ch'elli avianu addossu è fecenu coglie à Ghjesù. ₃₆À misura ch'ellu viaghjava a ghjente li lampava panni davanti, in la strada.

₃₇Mentre ch'ellu s'avvicinava da Ghjerusaleme, in la falata di u Monte di l'Alivi, a folla di i discipuli, raligrendu si à voce rivolta, messe à ludà à Diu, di tutti i miraculi ch'elli avianu vistu. ₃₈Dicianu:

₃₉Unipochi di Farusei, avvuleghju à a folla, dissenu à Ghjesù: «o Maestru, fà ch'elli si chetinu i to discepuli.» ₄₀Rispundì: «a vi dicu, s'elli si chetanu, sò e petre chì anu da briuna.»

₄₁Quand'ellu fù di punta à a cità, Ghjesù, videndula, piense dicendu: ₄₂«si tù a sapissi ancu tù, oghje, ciò chì accorre à a to pace! Ma par avà, hè piatta à i to ochji. ₄₃T'anu da vene addossu i ghjorni chì i to numichi t'arrivignaranu di impalancati, t'accamparanu è ti incagnaranu da ogni latu. ₄₄Ti ghjucaranu in bruma, à tè è à i to figlioli in senu à tè è ùn firmarà di tè mancu una petra annantu à l'altra, causa d'ùn avè cunnisciutu u tempu chì tù eri visitata.»

₄₅Intrì in lu tempiu è messe à caccià fora quelli chì vindianu, ₄₆dicendu: «hè scritta:

₄₇Stava à insignà tutti i ghjorni in lu tempiu. È i capi sacerdoti, è i Maestri di a Lege si pruvavanu à fà ch'ellu sia tombu, è i capipopulu dinò; ₄₈ma ùn sapianu comu fà chì tutta a ghjente l'era appressu, à coglie e so parolle.