Galated 6

₁Breudeur, mar tigouez da eun den beza kavet en eur faot‐benag, c’houi pere a zo spirituel, divankit anezhan gant eur spered a zousder. Diwall ouzid da‐unan, gant aoun na vez ive tentet. ₂Dougit an eil beac’hiou egile, hag evel‐se likit en pratic lezen ar C’hrist. ₃Rag, mar d’euz unan‐benag hag a zonj dezhan ez eo eun dra‐benag, pa n’ed eo netra, en em drompla a ra he‐unan. ₄Mes ra zeui pep hini da amprouv he oberou he‐unan, ha neuze hen devezo leac’h d’en em veuli enhan he‐unan, ha nann ouz en em gompari gant ar re all; ₅rag pep hini a zougo he veac’h he‐unan.

₆Ra zeui an hini a vez kelennet er Ger, da rei lod euz he holl vadou d’an hini a gelen anezhan. ₇Diwallit d’en em drompla; ne vez ket great goab ouz Doue; rag an den a zastumo ar pez hen devezo hadet. ₈An hini a had evit he gig he‐unan, a vedo euz ar c’hig ar vreinadurez; mes an hini a had evit ar Spered, a vedo euz ar Spered ar vuez eternel. ₉Na skuizomp ket eta oc’h ober ar mad, rag en amzer ma’z eo dleet, e kavimp da vedi, mar ne deuomp ket da skuiza. ₁₀Rag‐se, e‐keit ha ma hon euz an occasion, greomp vad d’an holl, mes dreist‐holl d’ar re a zo euz a famill ar feiz.

₁₁Gwelet a rit pebez lizer braz em euz scrivet deoc’h gant va dorn va‐unan.

₁₂Kement holl hag a fell dezhe plijoud deoc’h, hervez ar c’hig, a laka ac’hanoc’h d’en em circoncisa, mes ne reont kement‐se, nemed evit gallout tec’hel ouz ar bersecution, abalamour da groaz ar C’hrist. ₁₃Rag ar re circonciset ho‐unan na viront ket al lezen; mes c’hoant ho deuz e vec’h circonciset, evit galloud en em c’hlorifia ho‐unan en ho kig. ₁₄Evidoun‐me, gras ma na c’hoarvezo biken ganen d’en em c’hlorifia, nemed e croaz hon Aotrou Jesus‐Christ, dre behini ez eo crucifiet ar bed evidoun, ha me ive d’ar bed. ₁₅Rag en Jesus‐Christ ar circoncision na dalv netra, nag an dicirconcision ken‐neubeud, mes red eo genel a‐nevez. ₁₆Ha kement hini hag a vale hervez ar reglen‐man, ra vezo ar peoc’h hag an drugarez varnezhe, ha var an Israel a Zoue! ₁₇Diwallo den da ober poan d’in divar vreman, rag dougen a ran em c’horf merkou an Aotrou Jesus. ₁₈Breudeur, ra vezo gras hon Aotrou Jesus‐Christ gant ho spered! Amen.