II Thessalonied 3

₁A‐hend‐all, breudeur, pedit evidomp, evit ma vezo ger an Aotrou libr da redec, ha ma vezo glorifiet dreholl, evel ma’z eo en ho touez; ₂ha ma vezimp delivret euz a dud noazus ha drouk; rag an holl n’ho deuz ket ar feiz. ₃An Aotrou a zo fidel hag a grenvaio ac’hanoc’h, hag ho miro euz an drouk. ₄Ha bez’ hon euz ar fizians‐man en ho kenver en Aotrou, penaos e rit hag e reot an traou a c’hourc’hemenomp deoc’h. ₅Ra zeuio an Aotrou da ren ho calonou da garantez Doue, ha da c’hortoz ar C’hrist gant patianted.

₆Breudeur, recommandi a reomp deoc’h ive, en hano hon Aotrou Jesus‐Christ, pellaad diouz peb breur hag a vev en dizurz, ha nann hervez ar gelennadurez hen deuz recevet diganeomp. ₇Rag gouzoud a rit hoc’h‐unan penaos e tleit imita ac’hanomp, pa’z eo gwir n’hon euz ket bevet en ho touez en dizurz, ₈ha n’hon euz debret bara den e‐bed evit netra, mes ma’z omp bet er skuizder, hag er boan, o labourat noz‐deiz, evit miret da zamma hini ac’hanoc’h. ₉N’e ket dre ma n’hon doa ket a urz d’hen ober, mes evit rei deoc’h enomp hon‐unan eur skouer deoc’h da imita. ₁₀Rag ive pa oamp ganeoc’h, e lavaremp deoc’h freaz, penaos piou‐benag na fell ket dezhan labourat, na dle ket dibri ken neubeud. ₁₁Koulskoude e klevomp lavaret penaos ez euz hinienou en ho touez hag a vev en dizurz; ne labouront ket, ha koll a reont ho amzer en traou didalvoudus. ₁₂Hogen, alia a reomp ar re a zo evel‐se, hag e pedomp anezhe dre hon Aotrou Jesus‐Christ, da labourat en peoc’h, evit gounid ar bara a zebront. ₁₃Evidoc’h‐hu, breudeur, na skuizit ket oc’h ober ar mad. ₁₄Ha mar d’euz unan‐benag ha na zent ket ouz ar pez a leveromp dre al lizerman, taolit pled dezhan, ha na zarempredit ket anezhan, evit m’hen devezo mêz. ₁₅Koulskoude, na gemerit ket anezhan evel eun adversour, mes kelennit anezhan evel eur breur.

₁₆Ra zeuio an Aotrou a beoc’h da rei deoc’h he‐unan ar peoc’h en pep tra hag en peb amzer! Ra vezo an Aotrou ganeoc’h holl!

₁₇Ar zalud a zo euz va dorn va‐unan, me, Paol; hennes eo va zinatur em holl lizerou; evel‐se eo e scrivan. ₁₈Gras hon Aotrou Jesus‐Christ ra vezo ganeoc’h holl! Amen.