II Corintied 2

₁Decidet em boa eta enoun va‐unan na’z ajen mui d’ho kavout gant tristidigez. ₂Rag mar deuan da rei tristidigez deoc’h, piou a roio joa d’in‐me, nemed an hini a vezo bet lakeat ganen en dristidigez? ₃Ha scrivet em euz deoc’h evel‐se, evit pa vezin erruet, n’em bezo ket a dristidigez digant ar re a dlefe rei joa d’in; rag fizians em euz enoc’h holl penaos e rit holl ho choa euz va hini‐me.

₄Rag scriva a riz deoc’h en eun drubuil vraz, gant eur galon leun a enkrez, ha gant fors daelou; n’e ket evit ho klac’hari, mes evit rei da anaoud ar garantez dreist muzur em euz en ho kenver. ₅Mar hen deuz unan‐benag roet tristidigez, n’e ket me va‐unan hen deuz glac’haret, mes c’houi holl, da vihana en eun doare‐benag, rag ne fell ket d’in lavaret en tu‐all d’ar wirionez. ₆A‐walc’h eo d’eun hevelep den, beza bet punisset gant an niver brassa euz an dud, ₇en hevelep doare ma tleit kentoc’h pardoni dezhan hag he gonsoli, gant aoun na vez mantret gant eun dristidigez re vraz. ₈Abalamour da ze e pedan ac’hanoc’h da ziskouez ho karantez en he genver. ₉Rag evit se eo em euz scrivet deoc’h, evit galloud anaoud, en eur amproui ac’hanoc’h, ha c’houi a zo sentus e pep tra. ₁₀An hini eta da behini e pardonit, me ive a bardon dezhan; (rag evidoun‐me, ar pez em euz pardonet, mar em euz pardonet, eo abalamour deoc’h), dirag Jesus‐Christ, ₁₁evit ne vezo ket Satan treac’h deomp; rag anaoud a reomp ar pez a c’hoanta ober.

₁₂Hogen, pa zeuiz da Droas, evit prezeg Aviel ar C’hrist, petra‐benag ma hen doa digoret an Aotrou eun nor d’in, ₁₃na gaviz ket a repos em spered, abalamour ne gaviz ket eno Titus, va breur; rag‐se, goude beza kimiadet ouz ar breudeur, e teuiz d’ar Macedonia. ₁₄Hogen, ra vezo rentet grasou da Zoue pehini a ra deomp beza bepred treac’h er C’hrist, ha pehini a skuil dre enomp‐ni ar c’houez euz he anaoudegez e peb leac’h. ₁₅Rag ni eo ar c’houez vad euz ar C’hrist dirag Doue, evit ar re a zo salvet hag evit ar re a ia da goll; ₁₆d’ar re‐man, eur c’houez a varo, hag a laka da vervel; ha d’ar re all, eur c’houez a vuez, hag a laka da veva. Ha piou a zo barec evit an traou‐ze? ₁₇Rag ni ne droomp ket en faoz Ger Doue, evel ma’z euz kalz hag a ra; mes komz a reomp gant gwirionez, evel a‐berz Doue, dirag Doue, er C’hrist.