I Timoteus 4

₁Ar Spered a lavar sclear penaos en amzeriou diveza darn a droio kein d’ar feiz, oc’h en em rei da sperejou tromplus, ha da zoctrinou an droug‐sperejou; ₂dre hipocrizi doctored faoz, euz a bere ar goustians a vezo merket gant an houarn tom, ₃o tifen dimezi, hag o c’hourc’hemen en em briva euz a voued pere a zo bet crouet gant Doue, evit ma teuio ar re a gred hag ar re ho deuz anavezet ar wirionez da ober usach anezhe gant actionou a c’hras. ₄Rag kement tra a zo bet crouet gant Doue, a zo mad, ha netra na dle beza taolet kuit, pa rer usach anezhan gant actionou a c’hras; ₅rag santifiet eo dre c’her Doue, ha dre ar beden.

₆En eur lakaad an traou‐ze d’ar breudeur, dirag ho daoulagad, e vezi eur servicher mad da Jesus‐Christ, maget gant komzou ar feiz hag an doctrin vad ec’h euz heulliet gant aked. ₇Mes taol diouzid ar fablennou profan ha sod, ha laka da boan da greski er biete. ₈Rag an exercis euz ar c’horf n’eo talvoudec nemed evit neubeud a dra; mes ar biete a zo talvoudec evit pep tra, o veza m’he deuz ar bromessa euz ar vuezman hag euz an hini da zond. ₉Ar gomz‐man a zo gwir, ha dign euz a bep fizians. ₁₀Rag abalamour ma c’hesperomp en Doue beo, pehini eo Salver an holl dud, ha dreist pep tra Salver an dud fidel, eo ec’h anduromp kement a labouriou ha kement a zismegans. ₁₁Kemen ha desk an traou‐ze. ₁₂Ra ziwallo pep den da ober disprij var da yaouankiz; mes bez da‐unan eur skouer d’ar re a gred, dre ar gomz, dre ar vuez vad, dre ar garantez, dre ar spered, dre ar feiz, dre ar burete. ₁₃Ken a zeuin, en em ro da lenn, da exhorti, da gelen. ₁₄Na lez ket didalvoud an donezon a zo enoud, pehini a zo bet roet d’id dre ar brofesi, pa ho deuz conseil ar re Ancien astennet ho daouarn varnoud. ₁₅Sonj mad en traou‐ze, dalc’h da spered bepred sourciet ganthe, evit ma vezo anaten pep tra penaos e creskez. ₁₆Laka evez ouzid da‐unan hag ouz an doctrin; kendalc’h en traou‐ze, rag en eur ober kement‐se, en em zavetei da‐unan, hag ar re a zelaou ac’hanoud.