I S. Ian 2

₁Va bugaligou, scriva a ran antraou‐man deoc’h, evit na bec’hot ket. Ha mar d’euz unan‐benag hag hen deuz pec’het, hon euz eun avocat dirag an Tad, Jesus‐Christ ar Just. ₂Hen eo ar zacrifis a adunvaniez evit hor pec’hejou; ha n’e ket hep ken evit hon re‐ni, mes ive evit re ar bed holl. ₃Ha dre gement‐man ec’h ouzomp penaos hon euz anavezet anezhan, mar miromp he c’hourc’hemenou. ₄An hini a lavar: Me em euz anavezet anezhan, ha na vir ket he c’hourc’hemenou, a zo eur gaouiad, hag ar wirionez n’ema ket enhan. ₅Mes an hini a vir he c’her, a zo en gwirionez karantez Doue parfet enhan, ha dre an dra‐ze ec’h anavezomp emomp enhan. ₆An hini a lavar e ra he zemeurans enhan, a dle he‐unan ive bale evel ma hen deuz‐hen baleet.

₇Breudeur, na scrivan ket deoc’h eur gourc’hemen nevez, mes eur gourc’hemen koz, an hini hoc’h euz bet adaleg ar pen‐kenta; ar gourc’hemen kozze eo ar ger hoc’h euz klevet adaleg ar pen‐kenta. ₈Koulskoude, e scrivan deoc’h eur gourc’hemen nevez, ar pez a zo gwir enhan hag enoc’h, rag an devalijen a dremen, hag ar gwir sclerijen a zo dija o lugerni. ₉An neb a lavar ema er sclerijen, hag hen deuz kâs ouz he vreur, a zo c’hoas breman en devalijen. ₁₀Neb a gar he vreur, a choum er sclerijen, ha n’euz netra enhan hag a hell hen lakaad da gweza. ₁₁Mes an hini hen deuz kâs ouz he vreur, a zo en devalijen, hag a vale en devalijen, ha na oar ket da beleac’h ez a, rag an devalijen he deuz dallet he zaou‐lagad.

₁₂Scriva a ran deoc’h, bugaligou, dre ma’z eo pardonet deoc’h ho pec’hejou abalamour d’he hano. ₁₃Scriva a ran deoc’h, tadou, abalamour ma hoc’h euz anavezet an hini a zo adaleg ar pen‐kenta. Scriva a ran deoc’h, tud yaouank, abalamour ma hoc’h euz trec’het var an drouk‐spered. ₁₄Scriva a ran deoc’h, bugaligou, abalamour ma hoc’h euz anavezet an Tad. Scrivet em euz deoc’h, tadou, abalamour ma hoc’h euz anavezet an hini a zo adaleg ar pen‐kenta. Tud yaouank, scrivet em euz deoc’h, abalamour m’az oc’h krenv, ha ma choum ger Doue enoc’h, ha ma hoc’h euz trec’het var an drouk‐spered. ₁₅Na garit ket ar bed, nag an traou a zo er bed. Mar d’euz unan‐benag hag a gar ar bed, karantez an Tad n’ema ket enhan; ₁₆rag kement a zo er bed, droug‐ioul ar c’hig, droug‐ioul an daou‐lagad, hag ourgouil ar vuez, na zeu ket euz an Tad, mes euz ar bed. ₁₇Hag ar bed a dremen, hag he zrougioul ive: mes an hini a ra bolontez Doue a choum da viken.

₁₈Bugaligou, hou‐man eo an heur diveza; hag evel ma hoc’h euz klevet e tle dond an Ante‐Christ, brema dija ez euz meur a ante‐christ; dre eno ec’h anavezomp ema an heur diveza. ₁₉Eat int er meaz euz hon touez, mes ne oant ket euz hon re‐ni; rag ma vijent bet euz hon re‐ni, e vijent choumet ganeomp, mes kement‐se a zo c’hoarvezet evit ma vije discleriet penaos n’int ket holl euz hon re‐ni. ₂₀Evidoc’h‐hu a‐berz an Hini santel eo hoc’h euz recevet an onction, hag ec’h anavezit pep tra. ₂₁Scrivet em euz deoc’h n’e ket abalamour na ouzoc’h ket ar wirionez, mes abalamour ma c’hanavezit anezhi, hag abalamour na zeu gaou e‐bed euz ar wirionez. ₂₂Piou eo ar gaouiad, nemed an hini a nac’h penaos Jesus eo ar C’hrist? Hennes eo an ante‐christ, pehini a nac’h an Tad hag ar Mab. ₂₃Kement hini a nac’h ar Mab n’hen deuz ket ken neubeud an Tad; an hini a anzav ar Mab, hen deuz ive an Tad. ₂₄Ra choumo eta enoc’h ar pez hoc’h euz klevet adaleg ar pen‐kenta. Mar choum enoc’h ar pez hoc’h euz klevet adaleg ar pen‐kenta, c’houi ive a choumo er Mab hag en Tad. ₂₅Hag ar bromessa hen deuz great deomp eo ar vuez eternel. ₂₆An traou‐man em euz scrivet deoc’h divarben ar re a drompl ac’hanoc’h. ₂₇Mes an onction hoc’h euz recevet diganthan, a choum enoc’h; ha n’hoc’h euz ket ezom e teufe den e‐bed d’ho kelen; mes evel ma teu an onctionze da zeski deoc’h pep tra, ha ma’z eo gwirion, ha ma n’eo ket eur gaou, evel‐se, hervez ma’z eo bet desket deoc’h ganthi, choumit enhan. ₂₈Breman eta, bugaligou, choumit enhan, evit ma hon devezo fizians, pa zeuio, ha n’hor bezo ket a vêz dirazhan en he zonedigez. ₂₉Mar gouzoc’h ez eo hen just, gouezit penaos piou‐benag a ra ar pez a zo just, a zo ganet euz anezhan.