I Corintied 1

₁Paol, galvet da vezo abostol euz a Jesus‐Christ, dre volontez Doue, ha Sosthenes, ₂hor breur, da Iliz Doue a zo en Corinth, d’ar re a zo bet santifiet en Jesus‐Christ, pere a zo galvet Sent, ha d’ar re holl, en pep leac’h, hag a c’halv hano hon Aotrou Jesus‐Christ, ₃ho Aotrou hag hon hini. Gras deoc’h ha peoc’h digant Doue, hon Tad, ha digant hon Aotrou Jesus‐Christ! ₄Trugarekaad a ran va Doue bepred abalamour deoc’h, evit ar c’hras hen deuz roet deoc’h en Jesus‐Christ, ₅da lavaret eo: dre ma’z oc’h bet pinvidikeet enhan e pep doare, en kement a zell ouz ar gomz hag ouz an anaoudegez, ₆testeni ar C’hrist o veza bet etablisset mad en ho touez; ₇en hevelep doare ne vank donezon e‐bed deoc’h‐hu, pere a c’hortoz ma vezo diskouezet hon Aotrou Jesus‐Christ. ₈Derc’hel a raio c’hoas d’ho krenvaad beteg ar fin, evit ma viot didamal en deiz hon Aotrou Jesus‐Christ. ₉Doue, dre behini oc’h bet galvet da gommunion he Vab Jesus‐Christ, hon Aotrou, a zo fidel. ₁₀Hogen, ho pidi a ran breudeur, en hano hon Aotrou Jesus‐Christ, da veza accord assambles en ho komzou, da ziwall ne zavfe division en ho touez, mes da veza unanet mad assambles, a spered hag a zantimant. ₁₁Rag, roet eo bet d’in da anaoud, va breudeur, gant ar re euz a di Chloe, penaos ez euz disput en ho touez. ₁₂Da lavaret eo, pep hini, en ho touez, a lavar: Me a zo, diskibl da Baol; ha me, da Apollos; ha me, da Gephas; ha me, d’ar C’hrist. ₁₃Daoust hag ar C’hrist a zo diviset? Daoust ha Paol a zo bet crucifiet evidoc’h, pe daoust ha c’houi a zo bet badezet en hano Paol? ₁₄Trugarekaad a ran Doue abalamour n’am euz badezet hini ac’hanoc’h, nemed Crispus ha Gaïus; ₁₅evit na lavaro den penaos em euz badezet em hano va‐unan. ₁₆Badezet em euz ive famill Stephanas; mes a‐hend‐all, na ouzon ket ha me em befe badezet c’hoas unan all‐benag.

₁₇Rag n’eo ket evit badezi hen deuz kasset ar C’hrist ac’hanoun, mes evit prezeg an Aviel, nann gant furnez ar gomz, gant aoun ne vez rentet dic’halloud croaz ar C’hrist. ₁₈Rag predication ar groaz a zo follentez evit ar re a ia da goll; mes evidomp‐ni pere a zo salvet, ez eo ar galloud a Zoue. ₁₉Rag scrivet eo: Me a zistrujo furnez ar re fur, hag a gasso da netra gwiziegez an dud a skiant. ₂₀Peleac’h ema an den fur? Peleac’h ema ar Scrib? Peleac’h ema an disputer euz ar bed‐man? Ha n’hen deuz ket Doue diskouezet ez eo furnez ar bed‐man follentez? ₂₁Rag, o veza n’hen deuz ket gallet ar bed, dre he furnez, anaoud Doue, e furnez Doue, ez eo bet plijet gant Doue savetei, dre ar follentez euz ar bredication ar re a gred. ₂₂E‐pad ma ema ar Judevien o c’houlen miraclou, ha ma ema ar Greked o klask ar furnez, ₂₃ni a brezeg ar C’hrist crucifiet, scandal evit ar Judevien ha follentez evit ar Greked; ₂₄mes evit ar re a zo galvet, ken Judevien ken Greked, ar C’hrist eo ar galloud a Zoue hag ar furnez a Zoue; ₂₅rag ar follentez a Zoue a zo furoc’h eged an dud, hag ar zempladurez a Zoue a zo krenvoc’h eged an dud.

₂₆Considerit, breudeur, penaos en ho touez‐c’houi, pere a zo bet galvet, n’euz ket kalz a dud fur hervez ar c’hig, na kalz a dud galloudec, na kalz a noblans. ₂₇Mes Doue hen deuz choazet traou foll ar bed, evit ober mêz d’ar re fur, ha Doue hen deuz choazet traou dister ar bed, evit ober mêz d’ar re grenv, ₂₈hag an traou vil euz ar bed hag ar re a zo ar muia disprijet, memeus ar re n’int ket, a zo bet choazet gant Doue, evit kas da netra ar re a zo, ₂₉evit na zeuio den e‐bed d’en em c’hlorifia dirazhan. ₃₀Hogen, dreizhan eo ez oc’h en Jesus‐Christ, pehini a zo bet great evidomp a‐berz Doue, furnez, justis, sanctification ha redemption; ₃₁evit ma teui, hervez ma’z eo scrivet, an hini en em c’hlorifio, d’en em c’hlorifia en Aotrou.